Nagpatay sa call center agent, taxi driver hayan usa ra

CEBU, Philippines — Nagduda ang kapolisan nga ang nanulis ug nipusil patay sa 37-anyos nga call center agent sa IT Park ug sa 57-anyos nga taxi driver sa Tisa, Dakbayan sa Sugbo usa ra. Gidakop ang usa ka Eric Cabigas Ramos, 30, taga Sitio Pilipog, Mohon 1, Barangay Tisa, human kini gitumbok nga nitulis ug nipusil patay sa taxi driver nga si Victorio Manatad Molina alas 3 sa kaadlawon niadtong Miyerkules.

Nahitabo ang krimen sa Second Street, Naya Village, Barangay Tisa.

Ang deputy chief sa Mabolo Police Station nga si Police Senior Inspector Janielito Marquez niingon nga daku ang ilang pagduda nga si Ramos sab ang nitullis ug nipatay sa call center agent nga si Loraine Temple sa may Pope John Paul II Avenue ug dalan Guibilundo, Mabolo niadtong kaadlawon sa Oktubre 3.

Kini human niingon ang hepe sa mga imbestigador sa Punta Princesa Police Station nga si Senior Police Officer 2 Deo Clarin nga kun maalanganin si Ramos sa iyang biktima iya kining pusilon. Dugang pa niini nga nakapusil patay sab si Ramos niadtong 2016 apan nabasura ang kaso human giingong nawagtangan og interes ang kabanay sa biktima.

“Na-commit na gyud unta ni siya pero ang problema lang kay na-dismiss ang kaso kay dili na interesado ang ginikanan sa biktima mao to nakagawas siya,” si Clarin niingon sa Banat News.

Matud ni Marquez nga ipaatubang nila ang mga saksi sa pagpatay ni Temple ngadto kang Ramos aron masuta kun mao ba sab kini ang responsable sa maong krimen.

“Amo kuyogan didto sa Punta (police station) ipa-identify namo sa mga witness kung mao ba to ang suspek sad kang Temple,” si Marquez nagkanayon.

Kun positibong ma-identify kini sa mga saksi, mahatagan na gyud og kahayag ang kaso ni Temple kinsang gilubong na lang nga wala pa gihapon makabaton og hustisya.

Kahinumduman nga duha sab ka wala mailhing lalaki ang nitulis ug nipusil patay sa maong 37-anyos nga call center agent. (BANAT NEWS)