Polis nga residente ug botante sa Sugbo padayon ang allowance

CEBU, Philippines — Padayong makadawat og allowance ang mga polis nga nagserbisyo sa Siyudad sa Sugbo kon botante ug nagpuyo kini sa dakbayan sa sunod tuig.

Mao kini ang gisugyot ni Kevin Christer Paz, pangulo sa Peace and Order Program (POP) sa siyudad.

Matud ni Paz nga kaniadto bisan og dili botante sa Dakbayan sa Sugbo ang polis makadawat kini og allowance gikan sa siyudad apan karon kadto na lang residente ug botante sa siyudad ang hatagan og allowance.

Sa iyang bahin, si Konsehal Margarita Osmeña, chairperson sa committee on budget and finance nikwestiyon kabahin sa restriction sa siyudad sa paghatag og ayuda.

Matud ni Osmeña nga ang kapolisan bisan og dili mga botante ug residente sa Dakbayan sa Sugbo nagserbisyo kini sa siyudad.

Gibutyag ni Paz nga mao kini ang plano ug kamandoan sa iyang bana ni Osmeña nga si Mayor Tomas Osmeña.

Niining ulahi lang, Si Mayor Osmeña ug ang kapolisan sa siyudad dili kini maayo og relasyon tungod kay giingong ang kapolisan maoy nagpaluyo sa sunod-sunod nga patay sa Metro Cebu.

Si Marieta Gumia, budget officer sa siyudad nagkanayon nga ang maong restriction maimplementar kini kong ilakip sa budget ordinance.

Ubos sa giduso nga P8.1 bilyones alang sa 2019 annual budget ang POP niduso og P65 milyones nga budget alang sa peace and order personnel nga nagserbisyo sa siyudad ug laing P2.5 milyones alang sa allowance sa police personnel nga nadestino diha sa kabukiran sa siyudad.

Wala gahini og budget sa POP alang sa sunod tuig ang training sa polis ug pagpamalit og mga bala.

Matud usab ni Paz nga wala pa makuha sa kapolisan ang P5 milyones nga budget alang sa ilang training ug P3.5 milyones nga budget alang sa mga bala sa military ug polis.

Dugang niini, giduso usab ang P10 milyones nga budget alang sa confidential expenses sa mayor; P15 milyones alang sa barangay peacekeeping action team; P5 milyones nga allowance sa city fiscals; P3 milyones nga allowance alang sa Public Attorney’s Office; P8 milyones alang sa kabomberohan nga nagserbisyo sa siyudad; ug P10 milyones nga aid to judiciary. (/BDB)(BANATNEWS)