Duha sikop sa Oplan Alon
CEBU, Philippines — Nilusad kagahapon og lapad nga operasyon batok sa ilegal nga panagat ang Police Regional Office (PRO)-7 diha sa duha ka isla ug coastal municipalities sa Probinsiya sa Sugbo.
Ang maong operasyon gitawag kini og “Oplan Alon” diin ang mga otoridad nagpahigayon og seaborne patrol ug nag-served og mga search warrant ngadto sa gidudahang nalambigit sa ilegal nga panagat.
Lakip sa nagpahigayon sa operasyon ang Philippine Coast Guard (PSG), Armed Forces of the Philippines (AFP) Bureau of Fisheries and Aquatic Resources (BFAR).
Ang direktor sa PRO-7, Chief Superintendent Debold Sinas nagkanayon nga ang mao nilang operasyon nunot sa nadawat nila nga report nga nisiaw na usab ang ilegal nga panagat sa maong mga lugar.
Ang grupo nagpahigayon og seaborne patrol sa dagat sa Santa Fe, Daanbantayan, Medellin, San Remigio, San Francisco, Poro, Tudela ug Pilar Isla sa Camotes.
Samtang sa Lungsod sa Madridejos nag-served og search warrant ang grupo batok sa duha ka mananagat kinsa giingong mogamit og dinamita sa ilang pagpanagat.
Unang nadakpan diha sa Sitio Villagonzalo, Barangay Mancilang, si Wilson Saysis, 50-anyos, nagpuyo sa maong dapit.
Nakuha gikan kang Saysis ang duha ka kilong ammonium nitrate, siyam ka piston ug unom ka posporo. Giingong nadakpan na niadtong tuig 2017 tungod sa ilegal nga panagat si Saysis.
Samtang sa Sitio Parbrika, Barangay Kangwayan nadakpan si Ephraim Villaruel Dela Cruz, 80- anyos, residente sa mong dapit.
Si Dela Cruz giingong naimbargohan kini sa kapolisan og dinamita nga gamiton sa pagpaniro og isda. (/BDB)(BANATNEWS)
- Latest