Suspek nga nitulis ug nipatay sa taxi driver sikop

CEBU, Philippines — Nadakpan niadtong Biyernes sa hapon ang usa sa mga suspetsado kinsa giingong nitulis ug nipusil patay sa 57-anyos nga taxi driver.

Ang nadakpan mao si Eric Cabigas Ramos 30-anyos, residente sa Sitio Pilipog Mohon 1, Barangay Tisa, Dakbayan sa Sugbo.

Niadtong Miyerkules sa kadlawon si Victorio Manatad Molina, residente sa dalan B. Logarta, Dakbayan sa Sugbo gitulis ug gipusil patay sa duha ka lalaki nga nagpakaaron-ingnong mga pasahero diha sa  second street, Naya Village, Barangay Tisa.

Si Senior Police Officer 2 Deo Clarin, chief investigator sa Punta Princessa Police Station nagkanayon nga ang saksi sa maong krimen positibong nitumbok kang Ramos.

Matud ni Clarin nga nakadawat sila og report gikan sa usa ka polis nga giingong ang suspetsado nanghambog kini kabahin sa nahisgutang krimen.

Giingong nianang pagkagabii human sa nahitabong krimen nakig-inom ang suspetsado sa mga bata-bata sa nahisgutang polis ug giingong nanghambog kini nga siya ang nipusil patay kang Molina.

Human nakadawat og report gironda sa kapolisan ang balay sa suspetsado.

Giingong napalgan sa mga polis diha sulod sa balay ni Ramos ang puti nga t-shirt ug short nga gisul-ob sa suspetsado atol sa krimen diin nakita kini diha sa footage sa Close Circuit Television (CCTV) ug natukma sa testimoniya sa saksi.

Samtang ang laing kauban ni Ramos padayon kining gipangita sa kapolisan.

Si Ramos sa iyang bahin, nihimakak sa maong pasangil batok kaniya ug nangangkon kini nga namintal siya sa ilahang balay niadtong higayon nga nahitabo ang krimen.

Dugang  pangangkon ni Ramos nga maglisud na gani siya og lakaw tungod sa iyang tahi sa operasyon sa iyang tiyan tungod kay napusilan siya dihang nidagan siya aron molikay sa checkpoint. (/BDB)(BANATNEWS)