SK chairman na-missing

CEBU, Philippines – Mga ginikanan sa 18 anyos nga Sangguniang Kabataan Chairman sa Barangay Tigbao, sa Lungsod sa Badian nidangop sa kapolisan human gikatahong na-missing ang maong opisyal sugod pa niadtong Huwebes sa gabii.

Giila sa kapolisan ang gipangita nga batan-ong opisyal mao si Reynell Cantila, residente sa maong dapit.

Sigun pa sa hepe sa maong estasyonan nga si Police Inspector Elmond John Mondaya nga katapusang nakit-an si Cantilla sa balay sa iyang higala sa dihang mopauli na kini pasado alas-10 na sa gabii niadtong Huwebes.

Apan nabuntagan nalang wala kini makaabot sa ilang balay hinungdan nga nabalaka ang iyang mga ginikanan.

Matud pa nga na-alarma ang kabanay niini human sila nakadawat og text message gikan sa maong biktima.

“Ni-text pa kuno ni pero di kaayo masabtan. “Nay, Tay bang” ra man ang sulod sa text. Matud sa iyang inahan nga mag nanay-tatay na siya nila,” butyag sa maong hepe.

Sa pagpangita sa dalaga, napalgan  ang motorsiko niini nga nagtuwad ug gibilin na dapit sa Manduyong Bridge kagahapon.

Giingong gilukop na nila og pangita ang palibot aron makita ang dalaga hasta sa mga kaila niini apil na sa mga tambalanan apan wala nila kini makita.

Ang higala sa biktima kinsang kanhi SK councilor usab sa maong barangay nga si Arthur Villar 23, nagkanayon nga miadto sa ilang panimalay ang biktima aron nga magpahilot apan pag alas-10 sa gabii niana nananghid kini nga mopauli sakay sa iyang motorsiklo.

“Naa man to siyay ka chat usa siya nilakaw. Wala sad ko nakaila kinsa,” matud niini.  Hangtud niining pagsuwat wala pa gihapon makit-i ang maong SK chairman.

Base sa tamdanan sa kapolisan makonsiderar ang usa ka tawo nga missing kon 24-oras na kining wala makita pagbalik. (/IBM)(BANAT NEWS)