SWAT team sa PRO-7 nasulod sa top 10

CEBU, Philippines – Nasulod sa top 10 base sa partial result ang team sa Police Regional Office-7 Special Weapons and Tactics sa gipahigayong SWAT challenged competition ngadto sa Dakbayan sa Davao niining ulahi lang.

Kini maoy gibutyag sa direktor sa PRO-7, Chief Superintendent Debold Sinas ug karong Lunes gikatakdang mogawas ang resulta sa ranking sa top 10.

Matud ni Sinas nga 60 ka team gikan sa nagkalain-laing regional offices ug Special Action Force (SAF) ang niapil sa maong kompetisyon.

Gibutyag ni Sinas nga ang maong kalamboan nunot usab kini sa nadawat nila nga suporta gikan sa mga business shooter.

"Compared last year naka-focus ta og usa ka team lang. We had three months to practice gisuportahan nato sila og mga bala and training plus naa poy tabang ang mga business shooters nga nagtabang pud sa amoa”, butyag ni Sinas.

Adunay 12 ka stages sa maong kompetisyon diin gipasigarbo ni Sinas nga nag-una ang PRO-7 SWAT Team sa obstacle course.

Nasayran nga gipilian ang tanang maayo nga mga operatiba sa SWAT gikan sa mga police office ubos sa PRO-7 ug gipaubos sila og grabeng training sulod sa tulo ka buwan isip pangandam sa maong SWAT challenge competition.

Human sa maong kompetisyon giigong dili na pabalikon sa ilang mga kanhi unit ang mga sakop sa team tungod kay himuon na sila nga PRO-7 SWAT Team diin sila ang tahasang moresponde sa mga dagkong alarma sa rehiyon.

Gawas niini, giingong gituyo usab kini ni Sinas aron nga mamentenar ang ilang training.

Niadtong Marso 1, 2018 unang gibuksan ni Presidente Rodrigo Duterte ang SWAT Challenge Competition didto sa Davao City diin tumong niini nga masuwayan ang skills ug kapabilidad sa mga SWAT team sa pag-handle sa mga simulation courses. (/BDB)(BANAT NEWS)