Way nisupak sa usbaw sa plite sa bus
CEBU, Philippines – Walay nisupak sa petisyon sa pagpasaka sa plitehan sa bus ug mini-bus atol sa public hearing kagahapon sa rehiyonal nga buhatan sa Land Transportation Franchising and Regulatory Board 7. Ang public hearing gitambungan sa mga operators sa bus ug mini-bus sa Probinsiya sa Sugbo.
Ang Cebu Provincial Bus Operators Association ug Cebu South Mini-Bus Operators Association niduso sa ilang petisyon sa niaging buwan.
Ang CPBOA ug CSMBOA nangayo og dugang nga P4 sa minimum nga plitehan gikan sa P6 ngadto sa P10 ug dugang nga 30 sentabos sa mosunod nga kilometro gikan sa P1.20 ngadto P1.50.
Si Julieto Flores, tigpamaba sa CPBOA ug presidente sa CSMBOA, nagkanayon nga panahon na gyud nga mangayo sila og umento sa plitehan kay 2008 pa ang katapusang higayon nga nagpasaka sila og petisyon diin niadtong tungora kapin sa P20 pa ang litro sa krudo.
"Karon kay hapit na P50 ang matag litro sa diesel. Mao na nga kami nanghinaut nga aprubahan gyud sa LTFRB ang among petisyon," matud ni Flores.
Si Atty. Edwin Antepuesto, ang LTFRB-7 hearing officer, nihatag og 15 ka adlaw gikan kagahapong adlawa sa mga petitioners alang sa pag-submit sa ilang manifesto ug uban pang mga dokumento sa dili pa kini ipadala sa ulohang buhatan sa Manila nga maoy mohimo sa pinal nga desisyon sa maong petisyon. (/GMR)(BANAT NEWS)
- Latest
