Daghan wanted nadakpan sa Minglanilla

CEBU, Philippines – Nag-una sa tibuok Probinsiya sa Sugbo ang Minglanilla Police Station sa may labing daghang nadakpan nga adunay warrant of arrest sugod niadtong Oktubre 31 hangtud petsa 2 sa Nobiyembre.

Gani giila ang ilang paningkamot ni Senior Supt. Manuel Aburgena, direktor sa Cebu Provincial Police Office (CPPO).

Si Chief Insp. Verniño Noserale, hepe sa Minglanilla Police Station, niingon nga nakuha nila ang wanted persons tungod sa specific tasking sa ilang mga sakop.

Ang daku sab nga nakatampo sa ilang kalampusan mao ang ilang programa sa Police Community Relation (PCR) nga “lollicops” nga mao ang paghatag og lollipop ngadto sa kabataan nga aduna’y nakabutang nga numero sa ilang hotline.

Gumikan sa maong programa daghan nga mga impormasyon nga ilang nadawat labot sa ilegal nga kalihukan sa mga personalidad nga badlungon.

“Taas ang kamot sa balaud nga magkinaunsa madakpan gyud sila. Magsilbing pagtulun-an nga mosurender nalang ang mga wanted persons kay makahatag pag pabor nila pinaagi sa mitigating circumstance once mo-volunteer sila og surender,” nagkanayon si Noserale.

Sa kinatibuk-an naka-serve og 11 ka warrant of arrest ang kapolisan sa Lungsod sa Minglanilla ug ang tanan nasikop gyud nila. (/GMR)(BANAT NEWS)