Mga kandidatong naa sa narco-list angay ipublikar

CEBU, Philippines – Suportado ni Bise Goberandor Agnes Magpale ang gusto ni Interior Secretary Eduardo  Año nga ipagawas ang listahan sa mga opisyales nga nalambigit sa illegal nga drugas nga magpapili sa 2019 midterm elections. Alang sa bise gobernador makiangayon ra kini aron maklaro sa mga botante kon kinsa sa mga kandidato ang nalambigit sa illegal nga drugas.

“I think it’s fair enough. Pero dapat verified ha?”  matud ni Magpale.

Si Año nagkanayon nga ang pagpagawas sa maong mga pangalan makatabang sa publiko sa pagpili kinsay angay botaran o dili.

Kompiyansa si Año nga niagi og igong eksaminasyon ang listahan sanglit upat ka ahensya sa gobiyerno ang nagsusi sa background sa mga personalidad nga anaa sa listahan.

Giawhag sa Interior Secretary ang mga political parties nga dili iapil sa ilang pangampanya ang mga kandidato nga apil sa drug list.

Si Magpale nagkanayon nga kon tinuod man nga nalambigit sa illegal nga drugas ang usa ka kandidato mas maayong otomatik silang tangtangon sa partido.

“I think political parties will automatically drop, they don’t have to be told makadaot man na nila,” matud ni Magpale. (/IBM)(BANAT NEWS)