Bomba naapil pagkarga sa yuta

CEBU, Philippines – Napalgan ang usa ka vintage bomb sa usa ka dumpsite sa Sitio Mangga, Cansojong, Dakbayan sa Talisay kagahapon alas 7:30 sa buntag.

Sumala pa sa usa sa mga niresponde nga si Police Officer 2 Otto Von Pulmones sa Talisay City Police Station nga nakadawat sila og tawag gikan sa usa ka opisyal sa barangay kabahin sa maong bomba.

Ang bomba gikan sa gideskargang mga yuta nga gikan pa sa Barangay Guadalupe, Dakbayan sa Sugbo. “Didto ni nakit-an pagdiskarga sa truck sa yuta gikan sa Guadalupe. Wala ra man kaayo siya naunsa sa impact paghabwa kay soft soil ra man sad siya,” sigun pa ni Pulmones.

Adunay gitas-on nga 22 pulgadas ang maong vintage bomb ug may gilapdon nga unom ka pulgadas.

“Estimate namo pag World War II pa ni nga klase,” dugang sa maong polis.

Ang Explosive Ordnance Division (EOD) na ang nikuha sa maong vintage bomb alang sa pag-dispose niini. (/GMR)(BANAT NEWS)