Cellphone sa gipatay nagsige’g tingog

CEBU, Philippines – Cellphone sa gipatay nga 23-anyos nga babayeng working student giingong nagsige og ring bisan og gitangtangan na og baterya ug gilubong sa kaang sa duha ka mga higala sa suspetsado nga gibinlan niini usa pa kini misibat.

Niadtong Domingo sa kaadlawon napalgang patay ug gigulgol ang liog ug adunay daghang samad dinunggaban si Charie Mae Mancia diha sa sud sa giabangan niining lawak sa boarding house sa Sitio Potat, Barangay Tinago, ning Dakbayan sa Sugbo.

Si Mancia lumad nga taga lungsod sa Aloguinsan ug nagtungha samtang nagtrabaho dinhi sa dakbayan.

Kagahapon sa buntag nadakpan na sa kapolisan ang gitumbok nga naghimo sa krimen nga si Emelito Torrejos Familiar ,24, residente sa maong barangay.

Ang imbestigador sa maong kaso nga si Senior Police Officer 3 Ruth Violango nagkanayon nga ang mismong mga paryente nga giduol sa suspek aron didto magtago maoy nisumbong sa kapolisan aron kini madakpan.

Giingong misuway kini og dangop sa iyang mga kaparyentehan didto sa habagatang bahin sa Sugbo apan wala kini dawata.

 Kagahapon matud pa nga didto kini katapusang midangop sa iyang ig-agaw sa Dakbayan sa Mandaue apan wala usab kini dawata, sa kakapoy didto na lang kini natog sa usa ka trak nga nahimutang sa butanganan sa mga cargo vessels diha sa may North Reclamation Area, Dakbayan sa Mandaue. 

“Continuous gyud ni siya, Na-monitor nato ang suspek pero idlas man gud. Gahapon, naadto pa ni’g Lapu-lapu, Carcar, Naga, Idlas gyud. Gahapon naay naka-tip nga nakatug na daw ni siya didto sa truck,” si Violango miingon.

 Matud ni Violango mitug-an kanila ang suspetsado nga human sa krimen, miadto siya sa balay sa iyang higala ug nangayo og tubig aron manghugas sa iyang nagkadugo nga lawas ug nangayo og sinina aron magilis kay napuno usab kini sa dugo.

“Nanguha pa ni siya og bike sa silingan unya mao iyang gigamit nga getaway,” sigun sa maong polis.

Dugang sa maong imbestigador nga gidudahan nila nga gibaligya na ang maong bike ug ang halin mao ang gigamit sa suspetsado og pamelete paingon ngadto sa iyang mga paryente.

Sa wala pa mibiya si Familiar, matud pa sa usa sa higala niini nga may gitunol kanilang puti nga Samsung J1 nga cellphone ang suspek mihangyo kining patagoan.

Apan ang usa pa nila ka higala nakuyawan kon diin gikan ang maong cellphone maong nadesisyonan nila nga ilubong na lang kini sa kaang.

“Di mi katulog ana. Sunogon unta gani namo. Gitangtang na gud namo ang battery unya gilubong. Kulbaan mi, nitingog pa man siya,” sigun pa sa usa.

Si Violango nagkanayon nga base sa ilang nakuha nga impormasyon walay relasyon ang duha ug pagpangawat ra gyud ang motibo niini.

“Dili sila kaila. kana sang suspek bag o pa naabot, pag August pa,  gikan na siya og city jail,” si Violango miingon.

Nadakpan niadtong Marso tuig 2013 si Familiar sa kaso sa pagpanulis.

Kasong robbery with homicide ang atubangon sa maong suspetsado.

Samtang ang duha ka mga higala niini himuong mga saksi batok kaniya. (/IBM)(BANAT NEWS)