Mga spaghetti wire gipanghipos

CEBU, Philippines – Ang kagamhanan sa Dakbayan sa Sugbo uban sa nagkalain-laing utility firms nanglimpiyo sa mga kable nga nagbitay diha sa J. Paras Street, Barangay Kasambagan.

Si Konsehal Jerry Guardo, chairman sa committee on environment, energy, transportation, communication and other utilities nagkanayon nga makita nga ang installation sa mga wire sa siyudad gubot ug hugaw tan-awon.

Hinungdan nga niumol sila og plano nga limpyohon kini ug gisugdan nila diha sa pilot area. Tinguha nila nga mamenosan ang redundant poles ug mawagtang ang dead wires o spaghetti wires.

Si Hentjie Bolido, department head sa street light and pole utilities department ug geographic information services department sa Visayan Electric Company (VECO) nagkanayon nga ang J. Panis Street usa sa ilang pilot area sa gitawag nila nga Telco bracket.

Patas-an ang installation sa mga wires gikan sa 16 ft. himuon na kining 20 ft. aron malikayan ang mga insidente nga dunay masangit nga mga truck ug maputol na hinuon ang mga wire.

Samtang si Guardo nagkanayon nga tumong sa pagpatuman sa color coding sa mga wire aron dali mailhan ang kompaniya nga nanag-iya niini. Ang implementasyon sa maong proyekto nagsugod kagahapon ug hangtod kini sa kataposang bahin sa buwan sa Nobiyembre.

Ug kon maaprobahan ang ordinansahon ni Guardo konkreto o metal na nga poste ang gamiton ug dili na tugotan tong mga kahoy. (/BDB)(BANAT NEWS)