12 ka SWAT gipaapil sa kompetisyon ngadto sa Davao

CEBU, Philippines – Gibuksan karong adlawa ang Special Weapons and Tactics challenge competition ngadto sa Dakbayan sa Davao.

"Good luck, ihatag gyud ang ilang best. Wala mi nianhi sa Davao para maglingaw-lingaw, nianhi mi para mo-compete and ipakita gyud ang the best," matud sa direktor sa Police Regional Office 7, Chief Superintendent Debold Sinas. Ang12 ka sakop sa SWAT sa PRO-7 ang isangka sa maong nasudnong kompetisyon sa Philippine National Police diin molanat kini og tulo ka adlaw.

Gibutyag ni Sinas nga gihatagan nila og mga maayo nga mga armas ug uban pang ekipo ang maong team aron sigurado kining makadaog sa maong kompetisyon.

Nasayran nga gipilian ang tanang maayo nga mga sakop sa SWAT gikan sa mga police office ubos sa PRO-7 ug gipaubos sila og training sulod sa tulo ka buwan isip pagpangandam sa maong SWAT challenge competition.

Human sa maong kompetisyon giingong dili na pabalikon sa ilang tagsa-tagsa ka mga estasyonan ang maong mga SWAT sanglit sila na ang himuong bag-ong PRO-7 SWAT.

Gibutyag ni Sinas nga aduna nay order ang maong mga sakop sa SWAT nga dili na pabalikon sa ilang mga estasyonan tungod kay posibleng mawagtang ang ilang nakat-onan sa training ug magpadayon ang mga competition sa SWAT.

Dugang ni Sinas nga mo-request sila og sakyanan ngadto sa Camp Crame alang sa maong bag-ong team aron aduna silay kaugalingong service kong adunay mga alarmahan.  (/BDB)(BANAT NEWS)