Duha ka pusher sa Danao sikop

CEBU, Philippines – Nasikop sa managlahing buy-bust operation sa kapolisan ang duha ka pusher sa Barangay Suba, Dakbayan sa Danao alas 4 ang takna kagahapon sa kaadlawon.

Giila ni Senior Police Officer 1 Arnold Labine ang ilang nadakpan nga si Raymond Capatiran, hingkod ang panuigon, taga Sitio Camalig Bato, Barangay Tabok, Dakbayan sa Danao.

Ang hepe sa kapolisan sa dakbayan nga si Superintendent Jaime Quiocho Jr. uban sa mga sakop sa Drug Enforcement Unit, Intelligence Operatives ug Philippine Drug Enforcement Agency ang nipahigayon sa buy-bust operation.

Nasakmit gikan sa dinakpan ang mga pinutos sa ginadili nga drugas nga motimbang og 2.1 gramos nga mobalor og dul-an sa P25 mil base sa Dangerous Drugs Board value, buy-bust money ug P400 nga gituohang halin. Ang dinakpan nagtingkagol na sa selda sa kapolisan samtang nagpaabot nga pasakaan og kaso.

Laing nadakpan mao si Noli Capuyan, 40-anyos, sa Barangay Sabang, Dakbayan sa Danao alas 5 pasado ang takna sa buntag kagahapon kinsa nasakmitan sa kapolisan og walo ka gagmay nga pakete sa shabu ug P500 nga marked money.

Ang mga dinakpan kasamtangan karong gibalhug sulod sa bilanggoan ug gipasakaan kini og kaso nga kalapasan sa Republic Act 9165 o ang Comprehensive Dangerous Drug Act of 2002. (Rowena D. Capistrano/GMR)(BANAT NEWS)