Davide ug Garcia nagka-sumpaki sa COA report

CEBU, Philippines – Bisan og numero uno ang probinsya sa Sugbo nga kinadatoang probinsya sa tibuok nasod, si kanhi kongresista Gwendolyn Garcia nikwestyon kon natagamtaman ba sab mga Sugboanon ang kalamboanan sa probinsya.

Base sa annual report sa Commission on Audit (COA) ang Probinsya sa Sugbo, adunay P34.14 bilyones nga total assets nga maoy nakapatungtong sa probinsya sa kinadatoang probinsya sa talaan.

Apan si Garcia nagkanayon nga walay bili ang titulo kung wala makabenispisyo niini ang mga Sugboanon.

“Ang pangutana mao: Kini ba natagamtam sa mga Sugbuanon? Titles are empty if these do not translate to real and meaningful benefits for the people of Cebu. Buhat ang ang pasultion,” matud ni Garcia.

“Cebu has always been the richest province in the country,” dugang sa kongresista.

Si Gob. Hilario Davide III nagkanayon dili makaingon si Garcia nga walay benepisyo nga nakuha ang mga Sugboanon ubos sa kasamtangang administrasyon sa Kapitolyo.

Matud ni Davide nga ubay- ubay ang mga proyekto ug programa nga ilang napatuman sa probinsya sukad siya nilingkod pagka gobernador niadtong tuig 2013.

Gitumbok ni Davide nga ang maayong paggunit sa panudlanan sa probinsya ug ang maayong pagdumala sa lalawigan ang yawe.

Misumbalik palabtik si Davide nga dili sama sa panahon niadtong si Garcia pa ang gobernador, ang iyang administrasyon nisubay sa mga balaod kon mosulod sa mga kontrata ang lalawigan apil na sa pagpamalit og mga gamit subay sa Procurement Laws.

“Unya moingon siya nga walay utang ang probinsya pagbiya niya? Naunsa , walay utang in her eyes, daghan man kaayong mga kontraktor nga naningil nato,” matud ni Davide.

Ang gobernador nidugang nga wala siya magpataka og waldas sa kwarta sa panudlanan sa probinsya sa Sugbo. “Wala tay Balili, wala tay CICC pero dato gihapon ta,” matud ni Davide nga ang gipasabot mao ang kontrobersiyal nga Cebu International Convention Center sa Mandaue City nga kausa ra nagamit ug ang Balili Property nga dunay mga bahin nga nahumod sa tubig nga gipalit sa probinsya.

Si Bise gobernador Agnes Magpale sa iyang bahin nagkanayon nga wala may dagkong proyekto sa impratraktura ang kapitolyo karon apan nakatagamtam ang mga Sugboanon sa mga priority projects sa gobernador sama sa premiums sa insurance sa mga mag-uuma nga ang kapitolyo ang nagbayad ngadto sa Philippine Crop Insurance ug ang Paglaum Scholarhip Program sa mga kabus nga tinun-an sa kolehiyo.

“We may not have that almost one billion structure that is called CICC, but we have delivered services to the poor,” matud ni  Magpale. (/IBM)(BANAT NEWS)