6 lang ang nakalapas sa ordinansa

CEBU, Philippines — Diyotay lang ang nadakpan atol sa kalag-kalag sa niaging semana nga nakalapas sa anti-littering ug anti-smoking ordinances sa Siyudad sa Sugbo kompara sa nilabay’ng tuig matud sa Cebu City Environment and Natural Resources Office (CCENRO).

Si Neda Cabrera, pangulo sa CCENRO nihulagway nga maayo ang resulta sa pagpakatap nila sa mga Barangay Environmental Officers (BEOs) diha sa mga sam-ang sa siyudad.

Ang BEOs nakig-alayon kini sa kapolisan kinsa nitabang og badlong sa mga tawo nga dili magpataka og labay sa ilang basura ug ingon man pagpanigarilyo bisan asang dapita. Matud ni Cabrera nga awareness campaign ang gihimo sa ilang mga BEOs labot sa saktong paglabay sa mga basura. Base sa ilang record unom lang ang nadakpan, diin upat niini nakalapas sa anti-littering ordinance ug ang duha sa anti-smoking ordinance.

Kadtong nakalapas sa anti-littering ordinance pamultahon og P500 ngadto na sa P5,000 ug sa anti-smoking ordinance makamulta og P2,000 ngadto na sa P5,000.

Ang mga nakalapas sa nahisgutang mga ordinansa hatagan kini og pito ka adlaw nga moadto sa buhatan sa CCENRO aron bayaran o mahusay ang ilang nahimong kalapasan ug kadtong dili motunga pasakaan og kaso sa CCENRO.

Giingong usa sa nakatabang nga diyotay lang ang nadakpan sa mga BEOs dunay mga nagdala  og kaugalingong sudlana sa basura ug sa ilang pagbiya ilaha usab kining gidala.

Atol sa pagsaulog sa kalag-kalag ang CCENRO nipakatap og 200 ka BEOs diha sa tanang sam-ang sa Dakbayan sa Sugbo. (BANAT NEWS)