Nob. 16 deadline sa Sinulog contingents

CEBU, Philippines — Gipahibawo ni Konsehal Dave Tumulak, over-all chairman sa Sinulog 2019, kutob lang sa Nobiyembre 16 ang pagpanawat og mga contingents alang sa Sinulog sunod tuig.

Si Tumulak niasoy nga duna na sila’y meeting nga gipahigayon tali sa mga choreographers nga moapil sa Sinulog sa Barangay ug Lalawigan.

Sa Sinulog sa Barangay ang mga nikompirmar nga moapil naglangkub sa Suba, Sawang Calero, Basak-San Nicolas, Guadalupe, Labangon, Sapangdaku, Talamban, Mabolo, Mambaling, Cogon Pardo, Cambinocot, San Nicolas Proper ug Inayawan samtang sa Lalawigan ang Talisay, Carcar, Bogo ug Ginatilan.

Si Tumulak niasoy nga duna pay uban nga moapas apan kini nipahinumdum sa deadline sa pagpanawat sa mga gustong moapil sa Sinulog aron mapangandaman nila og maayo ang Sinulog sunod tuig. Posible sab nga gamay ra ang mga out-of-town contingents nga moapil sa kalihukan.

“Out of town contingents nag-expect ta karon nga dili ni susama sa niagi even though naa nay nipahibawo na, nanawag na daan ang duha sa Negros, diha say Leyte, naa say Mindanao nga mipahibawo na sila daan but we cannot confirm until makita namo ang ilahang papel, ang ilahang application sa Sinulog so expect sad ta nga mas mo-lesser,” asoy ni Tumulak.

Gipahibawo hinoon sa konsehal nga nagsige na sila og padala og imbitasyon alang niadtong mga gustong moapil sa Sinulog 2019.

Tinguha nila nga naa lang sa 25 ka contingents ang apil sa Sinulgog 2019 ug napanglantawan nila nga daghan ang floats karon gumikan sab sa bag-ong slogan nga “One Beat, One Dance for the World”.

Gihulagway ni Tumulak nga alegre gyud ang buwan sa Enero gumikan sa nagkalain-laing kalihukan nga ipahigayon sa tulo ka dapit nga naglangkub sa Fuente Osmeña Rotunda, Plaza Independencia ug South Road Properties.

“Ang tuyo nato ini is pagbahin sa crowd, bahinon ang crowd nya di sad sila angay mag-problema sa SRP kay we have enough buses, naa gani diha pud ang private firm nga dunay bus moagi dinha, nya naa say atoang Kaohsiung so kato sad dunay sakyanan adto sad sila didto naa gihapoy food parks,” matud ni Tumulak.

Samtang gipahibawo niini nga sa Enero 12 ipahigayon ang Sinulog sa Lalawigan, Enero 13 ang sa Sinulog sa Barangay samtang sa Enero 20 ang Sinulog Grand Parade. (BANAT NEWS)