Anak nagmaoy gipatay sa amahan

CEBU, Philippines — Patay ang usa ka lalaki human siya giluba sa makadaghang higayon sa iyang amahan didto sa ilang panimay sa Sitio Lupa, Purok 15, Barangay Cadulawan, Lungsod sa Minglanilla niadtong Domingo sa alas 7 sa gabii.

Ang biktima nailhan nga si Clemencio But-oy, 34, nagpuyo sa Sitio Hinayhay, Purok 14, Barangay Cadulawan sa maong lungsod. Samtang ang suspek mao si Winefredo But-oy, 62, nga nagpuyo sa maong dapit.

Si PO3 Junyl Ater sa Minglanilla Police Station nibutyag nga giusa sa pagsaulog ang adlaw’ng natawhan sa suspek ug sa iyang asawa samtang ang iyang anak maoy usa sa mga bisita.

Matud pa nga alegre pa man sila nianang pagkabuntag sa dihang sila nagsugod og sayo sa kombira ug pagtagay sa ilimnong makahubog.

Apan gikatahong pwerteng huboga sa biktima ug kalit lang nga nagmaoy hinungdan sa kagubot ug hasta ang iyang amahan gisukmag.

Gibuwag sa mga kabanay ang duha diin gidala sa sud sa balay ang amahan  apan giingong namugos ang biktima  pagsulod sa balay kay gustong makighusay hinungdan nga nadunggaban hinuon kini makadaghang higayon sa suspek.

Tungod sa kadaghan sa samad nga naangkon nakabsan sa kinabuhi ang biktima samtang ang suspek boluntaryo nga nitahan sa iyang kaugalingon ngadto ni barangay Kagawad Medardo Dayangco apil na ang kutsilyo nga iyang gigamit sa krimen.

Matud pa ni Ater nga base sa natigom nilang impormasyon manghasi kon mahubog ang biktima ug gituohang napuno na ang amahan niini ug wala na kini makapugong.

Gikatakdang pasakaan og kasong parricide ang suspek nga gitanggong na sa bilangguan. (BANAT NEWS)