PADS ipatuman ni Duterte sa tanang ahensiya sa gobyerno

CEBU, Philippines — Niluwat og executive order (EO) si Presidente Rodrigo Duterte alang sa pag-institutionalize sa Philippine Anti-illegal Drugs Strategy.

Ang maong kamanduan nagtinguha nga ma-update ug ma-develop ang kasamtangang Naional Anti-Drug Plan of Action (NPAD) 2015-2020 nga gigama sa Philippine Anti-illegal Drugs Strategy (PADS) alang ni sa pag-umol og programa ug proyekto lakip na sa kampanya  sa gobyerno pagbatok sa ilegal nga drugas.

“All government offices, departments, bureaus, agencies and offices, including government owned- or controlled corporations (GOCC’s) and state universities and colleges (SUCs) are hereby directed  to implement the PADS in accordance with their respective mandates” pagbasa sa EO No. 66 ni Duterte nga adunay petsa nga Oktubre 29, 2018.

Sa maong kamanduan ang Dangerous Drugs Board mao ang gitahasan nga mahimong lead agency sa pagpatuman sa PADS. Nakalatid usab sa maong EO nga ang tanang GOCC ug SUCs mogama ug mosumiter sa ilang operational plan subay sa PADS sulod sa 60 ka adlaw gikan niadtong Oktubre 29 ngadto sa DDB.

Kinahanglan usab nga adunay mapatuman nga drug free workplace program ang tanang ahensya sa gobyerno ug LGUs.

Si Ivy Durano – Meca ang kinsa maoy pangulo sa Cebu Provincial Anti-drug Abuse Office (CPADAO) nagkanayon nga niadto pang tuig 2016, ang mga programa ug proyekto sa ilang buhatan misubay sa PADS.

Matud niya nga daku ang matabang niini ngadto sa nagkadaiyang Anti-drug Abuse Council sa kalungsuran ug dakbayan lakip na sa barangay sa pagpatuman niini sa mga programa sanglit aduna kini giya kon unsa nga mga programa ang epektibo ug angay ipatuman. (/DILT)(BANATNEWS)