Negosyante gipatay, gisulod sa refrigerator

CEBU, Philippines — Patay nang napalgan ang usa ka 62 anyos nga negosyanteng babaye diha sa sulod sa refrigerator sa ilang compound sa Barangay Tabunok, Dakbayan sa Talisay kagahapon mga alas-11 sa buntag.

Ang biktima nailhan nga si Victoria Po Lua, nagpuyo sa maong dapit.

Si Police Officer 1 Berdin Bangcaya sa Talisay City Police Station nagkanayon nga usa ka John Dave Po, pag-umangkon sa biktima maoy nisumbong sa kapulisan sa pagkawagtang sa iyang iyaan sugod niadtong Nobiyembre 1 ning tuiga.

Sa tanto nilang pagpangita nabantayan sa mga kabanay ang nagkatag nga mga butang sa abandonado nilang bodega.

Matud pa ni Bangcaya nga natumba nasab ang puwa nga refrigerator hinungdan nga ilaha kining gisusi ug didto nakugang sila sa ilang nakita sa sud niini nga mao ang ilang iyaan nga patay na.

Si Supt. Marlu Conag, pangu sa kapulisan sa maong siyudad niingon nga na-report nga missing ang biktima niadtong petsa uno sa Nobiyembre.

Ang biktima giingong mao lang ang nabilin sa ilaha kay ang ilang banay nangadto sa sam-ang tungod sa kalagkalag.

Kauban niini ang mga trabahanteng lalaki kansang mga pangalan gipapugngan una sa kapolisan.

Nakita nilang Conag nga aduna’y vault nga nagawas na sa abandonadong bodega hinungdan nga nagduda sila nga pagpanglungkab ang motibo sa pagpatay sa biktima.

Gipaabot pa ni Conag ang report sa taga Scene of the Crime Operatives (SOCA) kalabot sa samad nga naangkon sa biktima nga maoy hinungdan sa iyang kamatayon.

Sa pagsuwat ning balita, gipangita pa ang tulo ka empleyado sa biktima aron makaestorya bahin sa maong hitabo (/IBM)(BANATNEWS)