Lalaking napusilan, suspek sa pagpatay
CEBU, Philippines — Lalaki nga naangol human gipusil didto sa Barangay Tagba-o, Dakbayan sa Sugbo niadtong Huwebes sa gabii nadiskobrehang aduna diay daghang kaso nga gidaganan.
Giila sa Talamban Police Station ang naangol mao si Jory Patindol, residente sa maong dapit. Ang hepe sa maong estasyonan nga si Police Senior Inspector Alvin Llamedo miingon nga gibanhigan si Patindol sa duha ka wala pa mailhing mga lalaki diha sa maong lugar.
Naigo sa iyang suwang lapos sa iyang liog ang biktima apan swerte nga nakaikyas ug nalandig sa tambalanan.
Giingong nagtaptap sa ilang mga nawng ang mga mamumuno ug dali nga nakasibat sakay sa usa ka motorsiklo.
Unang gitan-aw sa kapolisan ang anggulo sa selos sanglit matud pa nga minyo ang kapuyo ni Patindol.
Apan sa pagpalawom sa ilang imbestigasyon , nasuta nga aduna kini warrant of arrest sa kasong pagpatay didto sa Balamban niadtong tuig 2014.
"Nagduda na ko daan nga naa siyay gitago ug giplanohan na niyang moikyas sa hospital kay lain man nga pangalan iyang gidala. Sa ako mismo, ako man gyuy nangunay og interview niya atong gipusil siya, Jeylee iyang gidala unya dili Patindol iyang apilyedo. Gihunghongan ra ko sa barangay tanod didto nga Patindol diay na siya," si Llamedo nagkanayon.
Dugang butyag sa maong hepe nga sayo niining tuiga gipasakaan usab og kasong pagpamaligya og drugas ang biktima, apan wala pa lang miluwat ang warrant of arrest sa maong kaso.
Giingong gipahigayonan og drug buy bust operation sa mga operatiba sa Talamban Police Station ubos sa ilang hepe kaniadto nga si Police Senior Inspector Arieza Otida, apan nakaikyas kini.
Love triangle, pagpanimalos sa iyang gipatay ug ang ilegal nga drugas ang gitan-aw sa kapolisan nga mga anggulo sa maong krimen.
Niining pagsuwat, gipaubos sa hospital arrest si Patindol sa kaso niining pagpatay. (/IBM)(BANATNEWS)
- Latest