Kalag-Kalag 2018 malinawon

CEBU, Philippines — Malinawon nga natapos ang Kalag-kalag 2018  dinhi sa rehiyon  sumala pa sa kadagkoan sa kapolisan.

Si Chief Supt. Debold Sinas, direktor sa Police Regional Office-7 mipadayag nga generally peaceful ang rehiyon ug walay natala nga insidente labot sa kalag-kalag.

Karong adlawa, Nobyimbre 3 adlawng Sabado paubsan na ang alert status sa kapolisan.

Gibana-bana ni Sinas nga miabot ngadto sa 1,394,428 ang ihap sa mga tawong miduaw sa mga sam-ang sa tibuok rehiyon nga gibantayan sa 2,096 ka mga polis.

Aduna say 767 ka mga road marshals nga miabag sa pagmando sa trapiko ug 478 ka mga assistance hubs alang sa publiko ang kapolisan.

Ang direktor sa Cebu City Police Office nga si Senior Supt. Royina Garma anam-anamon nila og pullout ang ilang police deployment sa mga sam-ang, terminal ug mga pantalan sa Dakbayan sa Sugbo sugod karong adlawa.

“Nasa 50 percent na lang yung matitira. Depende na sa assessment sa COP (Chief of Police) kun kailan nila ipupull out lahat,” si Garma miingon sa Banat News.

Samtang sa probinsya sa Sugbo, mipadayag ang tigpamaba sa Cebu Provincial Police Office nga si Supt. Janette Rafter nga i-pullout na nila ang ilang pwersa ngadto sa mga sam-ang sa tibuok probinsya.

Giingong giplanohan pa nila kun ipabilin pa ang nagbantay sa mga terminal sa bus ug mga pantalan kay gipaabot nga mamalik na ang gikan sa ilang probinsya.

“Generally peaceful ang province except na kang sa mga minor traffic,” si Rafter miingon sa Banat News.

Adunay natala nga mga krimen apan wala kini kalabutan sa kalag-kalag matud pang Rafter.

Samtang gihulagway sa pangulo sa Cebu City Diaster Risk Reduction Management Office(CCDRRMO) Nagiel Bañacia way dagkong panghitabo nga natala ang Command Control Center sa siyudad.

Nakadawat lang sila og minor incidents sama niining mga mitaas ang highblood pressure, vehicular accidents ug uban pa.

Gihulagway ni Bañacia nga usa sa nakatampo aron kamalinawon sa kalag-kalag ang awareness sa publiko.

“Ang mga tawo aware na daan sila, aware na daan unsay buhaton, effective atong pagpahimangno, so far, so good, atong plano gumikan kay every year duna naman tay template unsa atong buhaton nahibawo na sad ang mga tawo unsay buhaton and then ang system nato within cemetery in place na so we can expect wala’y dagkong problema,” asoy ni Bañacia.

Kahinumduman nga dili momenus sa 200 ka mga personnel sa CCDRRMO ang gipakatap ug nag-instalar sila og tents, first-aid stations, portable toilet ug uban pa.

Samtang sa Cordova ug Carmen, ang mga kapolisan didto nanghatag og libreng bugnaw nga tubig, icecream ug paypay nga gihangop og maayo sa mga tawo.(Decemay Padilla ug Romeo T. Limpangog/IBM)(BANATNEWS)