Shabu nakasulod gihapon sa CCJ

CEBU, Philippines — Bisan sa kahigpit sa inspeksyon nalutsan pa gihapon sa mga ilegalista ang Cebu City Jail human sa nasakmit nga dul-an 20 ka mga paketeng gituohang shabu ug mga nagkadaiyang kontrabando sa gihimong greyhound operation sa Cebu City Jail Male Dormitory kagahapon sa alas-5 sa kaadlawon.

Gawas sa mga gidudahang drugas, nasakmit usab ang: napulo ka mga nagkadaiyang klase sa cellphones; lima ka chargers sa cellphone; 26 ka buok improvised nga mga hinagiban; mga lighter; baraha; tin foils; metal bars ug mga kubyertos.

Apan niining pagsuwat, wala pa matino sa mga otoridad kon kinsa ang tinubdan sa mga drogas ug ubang mga kontrabando ug kun giunsa kini pagpalusot didto.

Ang hepe sa CCPO Investigation Detective and Management Branch nga si Police Supt. Leoncio Baliguat nagkanayon nga gipangulohan ang maong operasyon sa Bureau of Jail Management and Penology-7 ug inabagan sa Cebu City Police Office ug sa Philippine Drug Enforcement Agency-7.

Gigamit sa PDEA 7 ang ilang mga drug sniffing dogs sa pag detect sa mga drugas nga gipangtagoan sa matag selda.

Kaniadto nagpinirmahay ang Police Regional Office-7, PDEA 7 ug BJMP 7 og memorandum of agreement diin magtinabangay sila alang sa ilang Oplan Linis Piitan aron mahingusgan ang kampanya kontra ilegal nga drugas diha sa mga prisohan.

Bisan kalag-kalag nagpadala gihapon og mga operatiba gipangulohan ni Police Chief Inspector Winston Peñaranda Jr. ang CCPO diha sa CCJ alang sa maong operasyon.

“We maximized the personnel bisag naa pa tay deployment sa mga cemetery,” matud pa ni Baliguat.

Niadtong Huwebes, mipahigayon usab og greyhound operation ang BJMP inabagan gihapon sa kapolisan ug ahensya sa PDEA 7  ngadto sa Cebu City Jail female dormitory apan wala silay nakuha nga mga kontrabando.

Tungod sa maong mga kontrabando gikanselar ang special unta nga dalaw kagahapon sa Cebu City Jail Male Dormitory h.

Matud pa ni Jail Supt. Renante Rubio, Jail Warden sa CCJ aduna siyay mga nadawat nga impormasyon nga adunay nakasulod nga kontrabando sa prisohan.

Dugang pa ni Rubio, maayo mangita og mga pamaagi ang nalambigit sa ginadili nga drugas kay gibuslotan ang tubo nga agianan sa hugaw sa tawo ug didto gihigot ang giputos nga drugas.

Apan nakit-an sa mga sakop sa BJMP ang buslot ug nakapahingangha kanila hinungdan nga ilang gisusi.

Sumala pa ni Rubio, tanan second floor sa Drug Offenders Building ang ilang gipaubos sa greyhound ug didto sa selda 12 nasakmit ang maong mga kontrabando.

Tungod kay walay miangkon , ang tulo ka mga dako-dako sa maong seldfa ang gibartolina.

Kagahapon inay aduna unta special nga dalaw subay sa adlaw sa mga kalag gikanselar kini agi og silot.

Gitug-an ni Rubio, nakig-alayon siya karon sa uban ahesya sa kagamhanan nga makabaton ug pukot aron ibutang gihapon sa likod nga bahin sa city jail tungod kay aduna gihapon makalusot panagsa nga bombing o fishing sa gawas nga bahin bisan ug aduna nay mga nagbantay. (Rowena Capistrano/IBM)(BANATNEWS)