Shabu gisud sa kinatawo

CEBU, Philippines — Gipasok sa kinatawo sa usa ka 24-anyos nga babaye ang shabu aron lang makalusot sa gwardya sa Talisay City Jail, apan wa magsilbi ang diskarte kay nasakpan kini.

Nagtingkagol karon si Gemma Delos Santos taga Barangay Tabunok, Dakbayan sa Talisay kinsa moduaw unta sa kapuyo nga si Dante Racaza nga aduna sa’y kaso sa illegal nga drugas.

Nakalusot si Delos Santos sa unang gate sa TCJ mga alas 3 sa hapon niadtong Martes.

Apan pinaagi sa CCTV nakit-an ang suspek nga kadudahan gyud ang lihok hangtud sa conjugal room hinungdan nga giatangan kini ni JO2 Rona Espinosa.

Dihadiha giduol kini ug girekisa hangtud nga nakuhaan gyud og duha ka medium nga pakete sa shabu diha sa ilawom sa iyang panty.

Matud pa ni Sr. Insp. Crisyrel Awe, warden sa TCJ bisan sa kahugot sa ilang gipatuman nga seguridad aduna gyud gihapoy mosuway sa pagpalusot.

Gani ikaduha na kining higayon nga gisuwayan sila sa pagpalusot og kontrabando sugod sa paglingkod ni Awe isip maoy bag-ong warden.

Gipahinumdoman ni Awe ang mga ilegalista nga undangon kining pagpalusot og drugas tungod kay madakpan ra gyud sila kadugayan.

Kagahapong adlawa gipasakaan og kaso si Delos Santos sa paghupot og ilegal nga drugas. -/IBM (BANATNEWS)