Kapitolyo half day karon

CEBU, Philippines — Tunga sa adlaw lang ang trabaho karong adlawa, Oktubre 31 sa Kapitolyo isip preparasyon sa pag-uli sa mga empleyado ngadto sa ilahang mga lungsod ug dakbayan alang sa kalag-kalag.

Matud ni Gobernador Hilario Davide, III nga tumong niini nga sayo maka-uli ang mga empleyado aron aduna silay igong oras sa pagpangandam sa ilang biyahe.

Samtang karong hapon bisitahon sa gobernador ang Cebu South Bus Terminal (CSBT) aron masusi niya ang sitwasyon sa terminal ug sa mga pasahero.

Si Davide niawhag sa mga bus operator nga siguradohon nga luwas sa biyahe ang mga bus paglikay sa disgrasya.

Gihangop ni Davide ang lakang nga gihimo sa Philippine Drug Enforcement Agency (PDEA) pagpaubos sa kinalit nga drug test sa mga bus driver ug konduktor sa CSBT.

Dugang ni Davide nga angayan lang nga dili tugotan sa mga bus operator ang ilahang mga konduktor ug drayber nga magpositibo sa drug test sanglit usa man sa kinahanglang i-prioritize sa mga bus companies mao ang kaluwasan sa mga pasahero niini. (/BDB)(BANATNEWS)

Pinay ug Australian national naghikog

Romeo T. Limpangog

CEBU, Philippines — Usa ka 22-anyos nga babaye ang naghikog pinaagi sa paghigot og bakus sa iyang liog diha sulod sa iyang kwarto nga gipuy-an niadtong Lunes sa gabii diha sa Zone Kasag, Barangay Kalawisan, Dakbayan sa Lapu-Lapu.

Si Police Officer 3  Samuel Yballe  sa  homicide section sa Lapu-Lapu  City Police Office (LLCPO) niila sa naghikog nga si Lilian Fuentes Villacorta,  dalaga, nagtrabaho isip production worker sa usa sa mga pabrika nga nahimutang sulod sa Mactan Export  Processing  Zone (MEPZ) 1 sa Barangay  Pusok sa maong dakbayan.

Matud ni Yballe nga ang duha ka higala ug kauban sa trabaho ni Villacorta ang nakadiskubre sa patay’ng lawas niini.

Giingong si Villacorta nipadala kini og mensahe sa text nga nanamilit ngadto sa nahisgutan niyang mga higala.

Sa imbestigasyon sa kapolisan giingong si Villacorta gikuwestiyon sa iyang supervisor sa trabaho tungod pagpunay niini og palta ug gituohan nga maoy hinungdan sa paghikog niini.

Sa laing bahin, usa ka Australian national ang naghikog usab diha sulod sa kwarto sa apartment nga iyang gipuy-an sa Sitio Timpolok,  Barangay Babag sa maong dakbayan niadtong Lunes sa hapon.  Ang naghikog mao si Ryan Dane Pairson, 25-anyos, ulitawo,  temporaryo nga nagpuyo sa maong dapit.

Matud ni Yballe nga ang kauban nga nagpuyo sa maong apartment  ang nakadiskubre sa patay’ng lawas sa maong langyaw nga nagbuy-od diha sa sulod sa lawak nga naglunang na sa kaugalingong dugo.

Sa crime scene napalgan ang suicide note ug ingon man ang kalibre .38 nga revolver nga gituohang maoy gigamit sa maong langyaw sa pagpusil sa iyang kaugalingon. (/BDB)(BANATNEWS)