Drayber, konduktor gipang-drug test

CEBU, Philippines — Dili mominus 30 ka drayber sa bus ug konduktor ang gipaubos sa kinalit nga drug test kagahapon sa Cebu South Bus Terminal (CSBT).

Ang maong screening nagsugod sa buntag nga gipahigayon sa Philippine Drug Enforcement Agency (PDEA) isip pagpangandam sa pagbiyahe alang sa kalag-kalag.

"Ang rason niini ang paghatag og kasigurohan sa atong mga pasahero nga luwas sila mosakay ining mga bus kay dunay mga drivers nga gipa-undergo og drug test," matud ni Jonathan "Joy" Tumulak, ang manager sa CSBT.

Matud ni Tumulak nga nipahigayon una siya og briefing sa mga personnel sa Civil Security Unit (CSU) ug blue guards diin iya sab gipang-imbargo ang mga cellphones niini pagseguro nga walay makapahibalo sa mga drayber ug konduktor ug dayon giuli pagpahigayon na sa drug test.

Si Tumulak nagkanayon nga ang mga magpositibo sa screening awtomatik kini nga temporaryong suspensohon samtang magpaabot sa resulta sa confirmatory test.

Kun positibo gihapon sa confirmatory test, dili na kini mahimong drayber o konducktor sa CSBT apan mamahimo gihapon makasulod isip pasahero.

Susama usab ang gihimo ngadto sa 46 ka drayber ug 22 ka konduktor sa Cebu North Bus Terminal nga gipaubos sab sa drug test sa mga sakop sa PDEA kagahapon sa udto.

Matud ni PDEA-7 Agent Jessie Cabutotan nga ang gihimo nga drug test dungan kini sa kamanduan sa ilang ulohang buhatan.

Malaumon si Cabutotan nga walay magpositibo apan tanang resulta ila kining ihatag sa mga kompaniya aron maoy mohukom sa mga magpositibo.

Gawas sa drug test, duha sab ka K9 dog ang nisusi sa mga kargamento kung wala bay mga kontrabando apan negatibo ang resulta. Gitug-an ni Cabutotan nga duha ngadto sa tulo ka adlaw ang resulta sa drug test mogawas.

Usa sa mga konduktor nga nahinabi nitug-an nga welcome ra niya ang maong drug test ug wala ra sab siya nahadlok kay dili man siya manggamitay og ginadili nga drugas. (BANAT NEWS)