Kompaniya sa California motuon sa trapik

CEBU, Philippines — Magsugod na ang Leotek, usa ka kompaniya nga nagbase sa California, sa pag-monitor sa sitwasyon sa trapik sa Siyudad sa Sugbo.

Si Konsehal Jerry Guardo kinsa chairman sa committee on transportation sa konseho sa siyudad, niingon nga human nipresentar ang Leotek sa ilang teknolohiya sa pag-monitor sa trapik, nitugot ang siyudad nga magsugod sila sa dry run karong Nobiyembre.

Ang intersection sa may M.J. Cuenco Avenue maoy subject sa test run sa Leotek pinaagi sa pag-install og closed circuit television (CCTV) cameras sa maong lugar aron masuta kun makapalambo ba kini sa traffic system sa dakbayan.

Niadtong Septiyembre nahimamat ni Guardo ang Leotek human sa ilang pagbisita sa Taiwan diin ang maong kompaniya maoy nag-instalar og cameras sa mga intersections sa maong nasud.

Sa maong sistema nakahatag kini og disiplina sa mga drayber hinungdan nga wala magduha-duha ang siyudad nga makig-alayon sa Leotek.

Ang mga personalidad sa Leotek nakigkita ni Mayor Tomas Osmeña niadtong Biyernes aron mopahibawo sa maong kalambuan.

Si Guardo niingon nga walay gasto ang siyudad sa pagahimoong dry run nga molungtad sa usa ka buwan.

Ang siyudad ug ang Leotek gikatakdang magpirmahay og Memorandum of Agreement (MOA) alang niini.

“Wait nalang sa city legal opinion basin ma-endorse na next week aron ma-include sa agenda,” matud ni Guardo.

Andam mohimo og terms of reference ang siyudad alang sa Public-Private Partnership (PPP) kung magmalampuson ang Leotek sa pag-implementar sa maong sistema. (BANAT NEWS)