250 ka polis sa LLCPO gi-drug test
CEBU, Philippines – Gipaubos sa kinalit nga drug test sa direktor sa Lapu-Lapu City Police Office (LLCPO) ang 250 ka polis gikan sa lima ka presinto sa siyudad.
Ang maong lima ka presinto gilangkuban sa Police Station 1 sa Barangay Santa Rosa, Isla sa Olango ug police station sa Barangay Mactan sa mainland, Police Station 3, sa Barangay Gun-ob, Police Station 4 sa Barangay Marigondon ug Police Station 5 sa Barangay Pusok.
Si Senior Superintendent Lemuel Obon, direktor sa LLCPO nibutyag nga iyahang gipatawag diha sa ilang head quarter ang maong mga polis sa pagtambong sa command conference nga gipahigayon diha sa sports complex diin adunay mga medical ang nagpaabot.
Matud ni Obon nga kinahanglan nga ang kapolisan sa Dakbayan sa Lapu-Lapu ang magsilbing modelo sa mga molupyo taliwala usab sa nagpadayon nilang paghingusog sa kampaniya sa pagsumpo sa ilegal nga drugas.
Dugang ni Obon nga ang resulta sa maong kinalit nga drug test nga gipahigayon sa mga sakop sa PNP Crime Laboratory -7 ilang masayran sa sunod nga mga adlaw ug ang positibo nga resulta ilang ipadala ngadto sa ulohan nilang buhatan sa Camp Crame alang sa confirmatory test nga pagahimuon. (/BDB)(BANAT NEWS)
- Latest