Kapitolyo nanghatag og emergency vehicles
CEBU, Philippines – Dili mominus sa 15 ka emergency rescue vehicles ang gihatag sa Kapitolyo ngadto sa mga provincial ug district hospitals sa Lalawigan sa Sugbo kagahapon.
Ang upat ka provincial hospitals sa Dakbayan sa Carcar, Danao ug Bogo, ug Lungsod sa Balamban lakip na ang 11 ka district hospitals ang nakadawat og Mitsubishi L300 van.
Wala pa naapil sa nahatagan kagahapon ang district hospital sa Minglanilla sanglit giproseso pa ang request niini.
Si Gobernador Hilario Davide III ug Bise Gobernador Agnes Magpale maoy nangulo sa turnover sa mga sakyanan ngadto sa mga chief of hospitals ug representante niini.
Matag unit sa sakyanan nagkantidad og P865,000 diin moabot sa P12.975 milyones ang nagasto tanan sa Kapitolyo.
Atol sa turnover, si Davide nagkanayon nga ang maong sakyanan alang kini sa mga transaksyon sa mga tambalanan sama sa pag-deliver sa mga supplies ug medical equipment.
Kini aron dili magamit ang mga ambulansya nga alang lang sa paghatud sa mga pasyente.
Si Dr. Olivia Dandan, chief of hospital sa Cebu Provincial Hospital–Balamban, nagkanayon nga gamit ang bag-ong unit nga gihatag sa Kapitolyo sa ilang adlaw-adlaw nga operason.
“Ang atong supplies ilabi na sa province, daghan supplies nga kuhaon, maglisud mi usahay nga wa mi magamit (nga sakyanan) kay ang atong ambulance for patients man na,” matud ni Dandan.
Gawas sa sakyanan sa mga tambalanan, ang Kapitolyo gikatakda usab nga mo-turnover og 23 ka units sa patrol car ngadto sa Cebu Provincial Police Office (CPPO) nga moabot sa P23.8 milyones tanan ang pagpalit sa probinsiya. (/GMR)(BANAT NEWS)
- Latest
