Way polis nga nalambigit s demolisyon

CEBU, Philippines — Gihimakak sa Cebu City Police Office Director nga si Senior Supt. Royina Garma nga may kalambigitan ang polis sa pagpangyabo sa tindang pagkaon sa usa ka menor de edad diha atubangan sa usa ka mall sa Barangay Pahina Central niadtong Domingo sa buntag.

Nag-viral sa social media ang post sa usa ka netizen diin makita ang hulagway sa batang vendor nga namunit sa iyang mga panindang mga pagkaon diha mismo tungatunga sa karsada.

Sa caption niini, giingong gibadlong ang maong menor de edad nga vendor sa polis kon nganong naninda kini sa maong dapit ug giingong giyabo sa  maong polis ang mga paninda sa bata.

Apan wala makita sa maong post ang hulagway sa giingong polis gawas lang nga ang nag-post miingon nga nakauniporme ang maong polis nga nadestino diha sa maong lugar.

Apan si Garma nagkanayon nga dili mandato nilang mga polis ang paghawan sa kalsada ilabi na kadtong mobadlong sa mga street vendors kay trabaho kini sa lokal nga kagamhanan.

“I personally conducted an investigation sa area and ang nag-conduct po ng clearing operation is ang LGU. Wala pong police doon and so ‘yung mga nagtapon ng paninda, O ano mang post na yun, di po ‘yun totoo,”si Garma miingon. Matud niya ang iyang mga polis magsul-ob og kompletong uniporme kon motabang sa seguridad sa pwersa sa lokal nga kagamhanan nga  dunay demolish operation apan dili sila maoy mangunay pagguba.

“We have been supporting ‘yung clearing operation ng PROBE  and my strict instruction, una ang role ng police is to make sure na ‘yung enforcement ng ordinance will be smooth, orderly and peaceful,” miingon sab si Garma.

Ang Prevention Restoration Order Beautification Enhancement (PROBE)  may gitahasan sa lokal nga kagamhanan nga mo-demolish ug mohawan sa karsadsa sa Dakbayan sa Sugbo. Si Chief Inspector John Kareen Escober hepe sa Carbon Police Station, diin nasakop ang maong lugar mihimakak nga wala silay susamang matang sa operasyon.

Si Garma sa iyang bahin mipadayag nga madawat ra usab nila kon mag-post og balik ang maong netizen nga mangayo og dispensa sa kapolisan.

“Sad to say, nasabi na mga police na. The damage has been done. Next time let us be responsible before mag-post kasi di po lahat ng nagpapatupad ng ordinansa ng siyudad at batas ay police meron ding ibang agencies na mandated also to implement mga specific na balaod,” dugang sa direktor. (BANAT NEWS)