Higpit ang panag-atbang ni Jonas, Luigi

CEBU, Philippines — Higpit ang panag-atbang nilang Mandaue City Mayor Gabriel Luis “Luigi” Quisumbing ug Kongresista Jonas Cortes sa pagka-mayor sa eleksiyon sunod tuig.

Si Quisumbing ug Cortes kauban sa partido sa ilang pagbaylo og pwesto sa niaging eleksiyon. Anaa pa sila sa tagsatagsa ka termino sa pagkakaron.

Katarungan ni Cortes sa iyang pagpapili pagbalik sa pagka-mayor mao nga buot niyang mahibalik ang mga paagi sa pagpaduol sa katawhan sa panerbisyo sa kagamhanan.

Gipalig-on ni Cortes ang iyang kandidatura sa pagka-mayor sa pinaagi sa ilang panag-alyansa ni kanhi konsehal Emmarie “Lolypop” Ouano-Dizon alang sa pagka-kongresista sa ika-unom nga distrito nga gilangkuban sa Cordova, Consolacion ug Dakbayan sa Mandaue.

Si Cortes maoy nangulo sa ilang pundok sa Kaabag, Inc. ug  nakig-alyansa sa Ang Nagkahiusang Katawhan (ANAK) sa Mandaue nga gipangulohan ni Ouano-Dizon.

Pares ni Cortes alang sa pagka-bise mayor mao si Provincial Board Member Glenn Bercede ug ang mga konsehal sila si kanhi kongresista Nerissa Soon-Ruiz, Cynthia Cinco Remedio, Maline Cortes-Zafra, Malcolm Sanchez, Carmelino del Mar, Atty. Joel Seno, Cesar Cabahug, Jimmy Lumapas, Andreo Incalina ug Jun Arcilla.

Si Quisumbing sa iyang pamahayag niingon nga ang Mandauehanon mopili base sa ilang nakita nga tinud-anay nga panerbisyo, walay pangurakot nga pang-gobiyerno ug dili mobase sa inila lang nga mga apelyedo.

Dugang pa niya nga ang Mandauehanon mohatag gyud og gibug-aton sa performance, good governance ug mosalikway kini sa corruption ingon man kalambigitan sa ilegal nga drugas nga maoy ilang gipasigarbo sa ilang pundok.

Si Quisumbing sama kang Bise Mayor Carlo Fortuna ang magpasubli sab alang sa ikaduhang termino nga nagdala sa ilang pundok nga Hugpong ng Mandauehanon para sa Pagbabago.

Ang ilang mga konsehal naglakip nila ni Elmer Cabahug, Raul Kevin Cabahug, Nilo “Olin” Seno, JP Ceniza, Alfonso “Dodong” Albaño, Paknaan Barangay Kapitan Malaquias Soco, kanhi barangay kapitan Leo Jabas, Leo Saberon, Robby Ben Basiga ug Atty. Laiza Gingoyon. (BANAT NEWS)