Mga krimen sa Probinsiya sa Sugbo nikunhod

CEBU, Philippines — Gidaghanon sa mga krimen sa Probinsiya sa Sugbo giingong nikunhod  sa ikatulong quarter niining tuiga base sa record sa Cebu Provincial Police Office (CPPO). Atol sa Provincial Advisory Council Summit niadtong adlaw’ng Biyernes gipresentar sa Police Regional Office (PRO) - 7 ang report sa CPPO.

Sa maong report, ang third quarter niadtong tuig 2017, niabot ngadto sa 15,343 ang non-index crimes samtang 3,893 ang index crimes.

Sa tuig 2018, sa susamang quarter nikunhod ngadto sa 13,336 ang non-index crime samtang ang index crime nikanaog ngadto sa 3,081 na lang.

Sa index crimes, 40 porsyento niini ang pagpangawat o theft ug gisundan sa physical injuries nga 29 porsyento samtang ang murder o pagpatay walo ka porsyento lang.

Si Police Senior Superintendent Manuel Javier Abrugena, direktor sa CPPO niangkon nga lisud sumpuon ang pagpangawat kon dili usab magpakabana ang publiko.

Matud ni Abrugena nga dili sa tanang higayon anaa ang presensiya sa kapolisan diin ang mga kriminal mangita usab og paagi nga makahimo og krimen.

Si Abrugena mapasalamaton kini sa nadawat nila nga suporta gikan sa lokal nga kagamhanan ingon man sa pribadong mga sektor. (/BDB)(BANATNEWS)