Bucao mihangop sa pag-atbang ni Villarante kaniya
CEBU, Philippines — Gihangop ni Bise Mayor Alan Bucao sa Siyudad sa Talisay ang pag-atbang unya kaniya ni kanhi bise mayor Romeo Villarante sa naasoy nga posisyon sa sunod tuig nga piniliay.
Ang panag-atbang ni Bucao ug Villarante sa pagka bise mayor maoy nagsilbing ikaduha nilang panag-abot sukad niadtong 2013 elections diin si Villarante maoy midaug.
Si Bucao nagkanayon nga ang iyang mga agi isip kasamtangang bise mayor mao ang iyang gisaligan sama sa mga resolusyon ug ordinansa nga napasar.
Una nang namahayag si Villarante nga kon siya buligan sa mga Talisaynon, wala siya’y problema kon si kinsa ang modaug nga mayor sa dakbayan.
Andam motabang si Villarante kang Samsam kay daan na siyang nakaila niini kon sila man ang paboran sa kahigayonan ug sama usab ngadto kang JVR diin andam siyang kalimtan ang tanan alang sa kalambuan sa Talisay.
Si Bucao mitataw nga stratehiya sab ni Villarante nga wala’y gidala nga mayor aron maguba ang kamada sa aduna’y grupo. Hinuon daku ang iyang pagsalig ni Samsam sukad nga sila nagkalambigit.
“No cloud of doubt ko ni Samsam kay walay higayon nga nag-istorya mi nga wala niya matuman,” asoy pa ni Bucao.
Iya hinoong gi-kwestiyon ang pamahayag ni Villarante nga mosusporta kini sa bisan kinsang molingkod nga mayor kay lagi alang niya diha na mosulod ang ambisyon inig lingkod sa maong posisyon. (/DILT)(BANATNEWS)
- Latest
