Davide magpabise gobernador ni Magpale

CEBU, Philippines – Si incumbent governor Hilario Davide III dili na kini motapos sa iyang kataposang termino isip gobernador sa Probinsiya sa Sugbo tungod kay magpapili kining bise gobernador sa 2019 midterm election.

Si Davide ug incumbent bise gobernador Agnes Magpale ang mag-tandem gihapon kini tungod kay si Magpale maoy magpapiling gobernador sa sunod tuig nga eleksiyon.

Kagahapon si Davide niduso kini sa iyang certificate of candidacy (COC) diha sa buhatan sa Commission on Election (Comelec) sa probinsiya diin gikuyogan siya sa iyang amahan nga si kanhi Chief Justice Hilario Davide, Jr., iyang asawa nga si Jobel, mga anak, Magpale ug ubang supporters.

Si Davide nagkanayon nga siya ang nihangyo kang Magpale nga magpuli sila og daganan sa umaabot nga piniliay.

Usa sa gitumbok ni Davide nga rason mao ang giingong paghulga sa ilang mga kaalyado sa Probinsiya sa Sugbo.

"There had been pressures, applied to our supporters, influential persons, dili na lang ko mohisgot sa pangalan apan na feel nako kong magpadayon kini , magpadayon ko pagka-gobernador maglisod unya ko laban kanila tungod kay wala man tay contact sa Maalcañang",  matud ni Davide. Nagtuo si Davide nga kong si Magpale ang mahimong gobernador mawala ang hulga ngadto sa ilang mga kaalyansa.

Si Magpale sa iyang bahin kompiyansa usab nga aduna siya’y kahigayonan nga pilion pagka-gobernador ug gikatakda nga moduso kini sa iyang COC karong adlawa.

Samtang si Kongresista Gwendolyn Garcia nagkanayon nga wala siya masurpresa sa anunsiyo nga si Magpale ang iyang makaatbang sa 2019 gubernatorial    race.

"It's a showdown between two women, one that has long served many many many many many many many years and a woman that has served over a decade",  matud ni Garcia.

Gihimakak ni Garcia ang pasangil nga adunay pressure ngadto sa mga mayor nga motapon sa ilang grupo. (/BDB)(BANAT NEWS)