Kaabag ug anak sa Mandaue nakasumitir na sa COC

CEBU, Philippines — Hingpit na nga nakasumitir sa ilang certificate of candidacy (COC) diha sa  buhatan sa Commission on Elections (Comelec) sa Dakbayan sa Mandaue ang tandem ni 6th District  Representative Jonas Cortes ug Board  Member Glenn Bercede.

Si Cortes ug Bercede maoy kandidato sa PDP Laban sa siyudad alang sa pagkamayor  ug pagkabise mayor sa midterm election sa                   2019.

Sa wala pa sila mopaingon ngadto sa buhatan sa Comelec nitambong una sila sa Santos nga Misa mga alas 7:30 kagahapon sa buntag nga gipahigayon diha sa National Shrine of Saint Joseph diin nitambong usab niini ang ilang mga dumadapig.

Si kanhi Mandaue City councilor Emmarie Lollypod Ouano-Dizon ug iyang igsuon nga si incumbent 6th district Board Member Thadeo Jonkie Ouano nipakita sa ilang hugot nga suporta.

Niadtong 2016 election ang Kaabag ni Cortes didto nagpaluyo sa kandidatura ni Mayor Luigi Quisumbing nga maoy kaatbang ni Lollypop ubos sa iyang pundok sa Anak sa Mandaue.

Sa 2019 election ang Anak sa Mandaue ni Lolypop ang nakighiusa na sa Kaabag ni Cortes nga mao usab ang mahimong kaatbang ni Quisumbing.

Nunot niini, gipakita usab ni 3rd district Representative Gwendolyn Garcia ang iyang hugtanon nga pagsuporta  kang Cortes ug sa iyang lineup isip kauban ubos  sa partido nga  PDP Laban.

Si Garcia sa One Cebu ug PDP Laban mao usab ang mokandidato alang sa pagkagobernador sa Lalawigan sa Sugbo isip sakbang ni Gobernador Hilario Davide,III nga magpasubli sa iyang ikatulong termino.

Nisumitir usab sa ilang COC ang ilang lineup nga sakop sa konseho nga naglakip nila ni Nerissa Soon – Ruiz, Cynthia Cinco-Remedio, Maline Cortes-Zafra, Malcolm Sanchez, Carmelino del Mar, Joel Seno, Cesar Cabahug, Jimmy Lumapas, Andreo Incalina, ug Jun Arcilla.

Si Lollipop ang misumitir usab sa iyang COC alang sa pagkakongresista sa ikaunom diha sa buhatan sa Provincial Comelec ug gisaksihan usab kini ni Garcia.

Lakip nga nilansar pagkabokal ang negosyante nga si Glenn Soco kinsa nibutyag nga una na siyang gitanyagan nga mahimong running mate ni Garcia apan wala siya modayon.

Nagtuo si Soco mas gikinahanglan siya sa provincial board nga katabang ni Jonkie sa mga programa sa ilang distrito.

Matud ni Soco nga ang iyang kasinatian sa pribadong sektor iya kining ma-apply sa iyang pagserbisyo isip bokal. (BANAT NEWS)