Kapin P2M shabu nasakmit

CEBU, Philippines — Mokabat lapas P2.4 milyones nga balor sa ginadiling drugas ang nasakmit sa gipahigayong operasyon kontra drugas dinhi sa Metro Cebu nga niresulta usab sa pagkasikop sa usa ka “high-value target” sa Sitio Sangi, Tabunok Talisay Sabado, 11:50 sa gabii.

Ang dinakpan nailhan sa ngalan nga Renato Rabaya Jr., residente ra pud sa maong barangay.  Sigon pa ni Police Superintendent Glen Mayam, hepe sa Drug Enforcement Group (DEG) sa rehiyon tulo ka buwan nilang gipanid-an ang suspek ug nigawas nga positibo ang impormasyong ilang nadawat nga nalambigit kini sa ilegal nga drugas hinungdan sa gilusad nga operasyon.

Matud pa nga gikontak sa mga polis si Rabaya aron palitan og shabu ug natigayon ang transaksyon sa parking area sa usa ka mall.  Ang dinakpan  sakay sa iyang motor ug midunol sa shabu ngadto sa polis nga poseur buyer.

Human sa pagtunol ug pagdawat sa kwarta gidakop kini sa mga polis.  “Ni-attempt pa ni siya og dagan human na nga ni declare ang ato operatiba nga dakpon na siya, nipadagan siya’s motor maayo na lang kay nakuptan pa ni siya,” sigon pa ni Mayam.

Nakuha kaniya ang iyahang motor duha ka paketeng gituohang shabu nga gibanabanang P2,360,000 sa Dangerous Drugs Board ang kantidad.

Matud ni Mayam, nagsige na og gawas ang pangalan ni Rabaya sa mga dinakpan sa Talisay City Police Station.

“This is a result of a follow-up operation from about three months ago, kato nadakpan namo ang usa sa iyang mga distributors, nga nisulti nga siya ang source. We conducted surveillance right then,” sigon pa ni Mayam.  Asoy pa ni Mayam, dugay nang namaligya og drugas si Rabaya ug miyembro sa gihulagway niyang “big time drug group”  apan idlas kini.  Gibutyag usab ni Mayam nga miangkon si Rabaya nga aduna kini contact sa Cebu City Jail nga maoy tighatag kaniya sa iyang supply sa illegal nga drugas.

Sa laing operasyon, nasikop usab sa buy-bust operation sa  Sitio Dauis, Barangay San Roque sa mao gihapong dakbayan ang lima ka mga tawo nga sila si Ruel Alcantara, 46; nga giingong nagpadagan og drug den; ug silang Manny Cabrera, 31;  Jimmy Chavez, 43;  Solimar Abastillas, 25; ug Jerome Abastillas, 30, nga naabtan sa sud sa drug den.

Nangulo sa maong operation mao si Police Chief inspector Ardiolito Cabagnot uban sa mga sakop sa PDEA 7 nga nakakuha og dul-an sa P89 mil  nga shabu, cellphone, drug paraphernalia, buy-bust money ug 500 pesos nga gituohang halin sa drugas.

Samtang sa operasyon nga gihimo sa mga sakop sa Sogod Police Station, nadakpan  ang usa ka  Emilia Naraja Arenas alyas Amelia,  57, diha sa pinuy-anan niini sa Sitio Camansi, Barangay Mohon sa maong lungsod.

Ang kapolisan mironda sa balay niini dala ang search warrant  gikan ni Judge Jerry Dicdican sa Regional Trial Court (RTC) Branch 25  sa Dakbayan sa Danao tungod sa paghupot og ilegal nga drugas.

Nakuha sa maong operasyon ang 12 ka gagmay’ng paketeng shabu, ug drug paraphernalia.

Samtang nadakpan usab sa mga sakop sa   Presinto 4 sa Lapu-Lapu City Police Office (LLCPO) gipangulohan ni Chief Inspector Juan Capacio si Lyndon Siroy Laurito,34, sa gihimong buy-bust batok kaniya sa Sitio Kadulang, Barangay Basak.

Nakuha gikan sa suspek ang napulo ka gagmay nga paketeng shabu ug ingon man buy- bust money sa poseur buyer. (BANAT NEWS)