COC filing sugod karong adlawa

CEBU, Philippines – Andam na ang Commission on Elections (Comelec) sa Probinsya sa Sugbo nga modawat sa mga mosumiter sa ilang sertipiko de kandidatura karong adlawa alang sa 2019 midterm elections.

Si provincial election supervisor Atty. Lionel Marco Castillano miawhag sa mga molansar nga mas maayo nga magsayo nga mo-file og certificate of candidacy (COC) aron kon adunay sayop, mausab dayon kini.

Matud ni Castillano nga mahimong personal ang pagduso sa COC o notaryado ang authority sa representante nga mo-file niini.

Gitataw sa election supervisor nga walay premature campaigning ug mahimong makadala og supporters ang mga molansar atol sa ilang pagduso sa COC apan kinahanglan nga anaa ra sa gawas sa buhatan sa Comelec aron dili kini makasamok sa  filing.

Adunay gidugang sa COC form diin giapil ang pangutana ngadto sa kandidato kon aduna ba kini kaso nga adunay silot nga perpetual disqualification ug final na ba ug executory ang desisyon.

Subay niini ang tanang mga kandidato sa Cebu City mapa-South o North District man adto mosang-at sa ilang COC sa Cebu City North District Office.

Mipadayag si kanhi konsehal Alvin Dizon nga lakip siya sa line-up sa mga konsehal sa BOPK ug gipaabot nga karong Oktubre 15 sila mosang-at sa ilang COC.

Si Konsehal Margarita Osmeña kinsa una na sab mipahibawo nga dili siya modagan sa mas taas nga posisyon karon nga napupos na ang iyang termino miingon nga kompleto na ang ilang line-up dungan sa pagbutyag nga si Mayor Tomas Osmeña subling magpapili sa sunod nga piniliay.

Gipahibawo usab ni Konsehal Joel Garganera sa Barug Team Rama PDP-Laban nga nag-meeting sila gahapon aron pag-finalize sa ilang filing sa COC ingon man sa ilang Certificate of Nomination and Acceptance (CONA).

Nagkanayon sab kini nga kompleto na ang ilang line-up.

Ang Comelec una nang mipahinumdom sa mga magpapili nga siguraduhon nga kompleto ang mga gikinahanglan nga mga dokumento aron malikayan ang technical errors. (Decemay P. Padilla/DILT)(BANAT NEWS)