LLCPO nipalig-on sa ilang relasyon sa komunidad

CEBU, Philippines – Gipalig-on sa Lapu-Lapu City Police Office (LLCPO) ang ilang relasyon ngadto sa mga lumolupyo sa kabarangayan sa siyudad lakip na ang Muslim Community.

Nunot kini sa nahitabo sa niaging semana nga gikaengkwentro sa kapolisan sa siyudad ang mga tawo nga giingong nalambigit sa ilegal nga drugas sa Barangay Pajac diin sa maong engkwentro pito ka kinabuhi  ang nakalas.

Sa niaging adlaw ang direktor sa LLCPO nga si Police Senior Superintendent Lemuel Obon ang nibalik sa Saint Michael, Barangay Pajac diin nahitabo ang nahisgutang insidente.

Ang kapolisan nakigdiyalogo sa mga residente sa lugar lakip na sa Muslim Community alang sa pagpatunhay sa kahapsay ug kalinaw ug nagpahigayon usab sila og feeding program.

Ang maong gihimo sa kapolisan gihangop kini sa mga residente diin gipadayag usab nila ngadto sa kapolisan ang ilang mga hangyo.

Ang maong panagtapok gipangulohan kini ni Obon ug gitambongan sa kadagkoan sa Muslim Community sa siyudad ug naglakip usab sa National Commission on Muslim-Filipinos-Visayas.

Gipasabot ni Obon ang kamahinungdanon sa ilang pagpadangat og kasayuran sa mga kauban niadtong pito nga ilang napatay sa engkwentro tungod kay bugti niini mao man ang kalinaw sa ilang dapit nga gipuy-an.

Si Obon nihangyo sa mga residente sa lugar sa pagtaho dayon ngadto kanila kong aduna silay mabantayan nga mga tawo nga katahapan ang mga lihok. (/BDB)(BANAT NEWS)