Caretaker sa gipuy-an ni Bas protektahan

CEBU, Philippines – Nisaad ang kapolisan nga protektahan ang caretaker sa giabangang balay ni Marc Ferdinand “Dindin” Bas kinsa giingong nakadungog ug nakakita nga adunay mga armadong lalaki nga nisulod sa Sitio Dumlog, Simala, Lungsod sa Sibonga niadtong Domingo sa gabii.

Kini bisan pa man og wala gyud maklaro sa caretaker ang mga panagway sa armadong lalaki suma pa sa direktor sa Cebu Provincial Police Office, Senior Supt. Manuel Javier Abrugena.

“In the course of the investigation bibigyan po namin siya ng protection para makuha namin yung loob niya to give information,” matud ni Abrugena. Samtang si Chief Supt. Debold Sinas, direktor sa Police Regional Office-7, nagkanayon nga lakip sa ilang gitan-aw ang posibleng kalambigitan sa mga hitman sa kontra ni Bas sa ilegal nga negosyo sa shabu.

Kahinumduman nga si Bas, kanhi barangay kapitan sa Lagtang, Talisay City, ang anaa sa listahan ni Presidente Rodrigo Duterte nga mga opisyal nga nalambigit sa ilegal nga drugas.

Niadtong Abril 30 gipagawas sa Philippine Drug Enforcement Agency (PDEA) National Headquarters ang listahan ug human sa tulo ka buwan gibanhigan patay ang 23-anyos nga anak ni Bas nga si Art Stephen Bas, kagawad sa Barangay Lagtang, Dakbayan sa Talisay.

Dugang ni Abrugena nga dili una sila moumol og Special Investigation Task Group alang kang Bas sanglit dili na siya opisyal sa Lagtang. “Hindi pa nag-create considering ito po ay hindi na incumbent barangay captain. If nasa puder siya as barangay captain, automatic magki-create ng SITG,” matud ni Abrugena.

Gawas sa anggulong kalambigitan sa drugas ug personal nga bangi, gitan-aw sab sa kapolisan karon ang anggulo sa politika sanglit gibutyag ni Arbugena nga nadeskobrehan nila nga adunay nakaaway si Marc Ferdinand dihang siya pa ang kapitan sa Lagtang. Dugang ni Abrugena nga ila sab gisubay kun aduna bay koneksyon ang pagpatay kang Marc Ferdinand sa nahitabo sa anak niini nga si Art Stephen kinsa hangtud karon wala gihapon mahatagi og hustisya ang kamatayon. (/GMR)(BANAT NEWS)