Tulo patay sa pagpamusil

CEBU, Philippines – Duha ka barangay tanod ug usa ka lalaki ang nangamatay sa tulo ka buwag nga insidente sa pagpamusil dinhi sa Metro Cebu sa miaging gabii ug kagahapong adlawa.

Kagahapon sa buntag, patay ang usa ka habal-habal drayber nga usa sab ka barangay tanod human kini gipusil sa Barangay Lagtang, Dakbayan sa Talisay. Ang biktima nailhan sa pangalan nga si Roger Labajo alyas Torjack,47, nagpuyo sa Barangay Sinsin, Siyudad sa Sugbo. Matud pa ni PO1 June Zamora sa Talisay City Police Station nga gikan sa bukid ang biktima kay naghatud og pasahero sa Barangay Tabunok.

Apan giingong na-flat ang ligid sa luyo sa iyang motorsiklo hinungdan nga iyang gipanaug ang iyang pasahero. Sa dihang nangita siya og vulcanizing shop  giduol kini sa wala mailhing tawo ug gipusil kini gikan sa luyo.

Matud pa nga nisarasay ang biktima samtang nagmaneho sa iyang motorsiklo hangtud nga nahagba. Si Dalia Cose, residente sa lugar nibutyag nga usa ka masipang buto ang ilang nadungog nga mao sab nakapaaghat kanila sa pagtan-aw sa lugar.

Gisubay pa sa kapulisan kon unsay background sa biktima. Wala usab matino kon gituyo ang pagsuyak sa ligid niini aron makahigayon ang mga mamumuno sa ilang dautang tuyo kang Labajo.

Parojinog gang

Sa Mandaue City,  patay ang 59-anyos nga barangay tanod sa Barangay Cubacub nga si Paulino Vega human kini gipusil sa wala mailhing mamumuno diha sa may Purok 6 sa maong barangay. Ang biktima nagbarog lang sa gawas sa iyang balay dihang giduol sa mamumuno ug gipusil sa makadaghang higayon nga nakaingon sa iyang kamatayon. Ang mamumuno gikatahong daling nisakay og motorsiklo nga gimaneho og laing tawo nga nagpaabot dili layo sa nahitaboan.

Base sa imbestigasyon sa kapulisan nasuta nga suod nga higala sa mga sakop sa Parojinog robbery and drug syndicate nga napatay sa nilabay nga bulan si Vega.

Sumala pa ni Police Senior Supt. Julian Entoma, MCPO City Director, usa sa motibo nga ilang gitan-aw karon mao ang pagpanimalos sa mga sakop sa Parojinog criminal gang kay aduna silay nadawat nga impormasyon nga gidudahan sa grupo nga gitraydor sila ni Vega.

Midugang si Entoma nga si Vega naapil sa ilang drug watchlist sukad pa niadtong bulan sa Hunyo. Nasayran usab nila nga managkauban pirme si Vega sa duha ka mga  napatay nga giingong sakop sa Parojinog drug group nga sila si  Mark Lester Castillo ug Renan Mabitad.

Cebu City

Sa laing pagpamusil nga nahitabo sa Dakbayan sa Sugbo sa miaging gabii, patay si Jason Faustor, taga lungsod sa Liloan ug nagtrabaho sa usa sa mga kompanya diha sa Cebu Business Park.

Ang biktima luwan sa iyang motorsiklo sa dihang gitaparan kini sa laing mga nagsakay og motor ug kalit gipusil diha sa Mindanao Avenue sa eskina sa Cardinal Rosales Avenue Cebu Business Park.

Sumala sa hepe sa Cebu City Police Station 4 nga si Chief Inspector Dindo Juanito Alaras nga base sa nakaylap nilang kopya sa footage sa closed circuit television sa lugar gisundan nang daan sa mga mamumuno si Faustor.

Matud pa nga paingon na mopauli gikan sa trabaho si Faustor sakay sa iyang motorsiklo.

“Naa ra siya sa luyo pag-stop. Gibana-bana gyud niya (suspek) kung hapit-hapit na mo go, gitaparan niya. Pag-go signal na gipusil dayon niya,” si Alaras miingon sa Banat News.

Human sa maong krimen, mi U-turn ang mamumuno ug milusot didto sa dalan Escario. Nadala pa sa tambalanan ang maong biktima apan pag alas dos sa kaadlawon kagahapon nabugtoan na kini sa iyang kinabuhi.

Gisubay karon sa kapolisan sa trabahoan ug sa pamilya sa biktima kon aduna ba kini nakaaway nga nahimong rason sa pagpatay sa biktima.(Romeo Limpangog, Rowena Capistrano ug Camille Pateres/IBM)(BANAT NEWS)