Solar panel project sa Santa Fe giprotestahan

CEBU, Philippines — Bisan sa mga kalapasan, gisubhan gyud sa kagamhanan sa Lungsod sa Santa Fe, Isla sa Bantayan ang Solar Panel Research Project niadtong Martes, Oktubre 2.

Ang inauguration and cutting of ribbon kabahin sa mga kalihukan sa ika-146 nga Founding Day sa lungsod niadtong Oktubre 3 nga may tema nga, “Pagpanalipod sa atong kalikupan maoy tagsa-tagsa natong kaakuhan.”

Niadtong Septiyembre 21, 2018, ang Department of Environment and Natural Resources niluwat og Notice of Violation ngadto kang Xena Joy Cruz, project study leader sa XLED, sa Barangay Talisay, Santa Fe.

Kini gipirmahan ni Jose Cleo Cary Colis, Protected Area Superintendent sa DENR Protected Area, Wildlife and Coastal Zone Management Services, Bantayan Island Wilderness Area (BIWA).

Matud ni Colis nga isip protected area, tanang pagpalambo sa sulod sa BIWA ubos sa DENR Administrative Order No. 17, series of 2007, nga nagkinahanglan og permit gikan sa Protected Area Management Board (PAMB) sa PA-BIWA sa dili pa sugdan ang proyekto.

“Based on field inspection and inventory of our field personnel, you are found to have constructed/established a Solar Power Energy Project in Brgy. Balidbid, Sta. Fe, Bantayan Island, Cebu without permit from the BIWA-PAMB, a violation in Section 20 of R.A. 7586,” matud ni Colis.

“Instead nga hunongon giapil pa sa program sa founding day ang pag-blessing sa illegal nga katukuran sa mao nga solar panel project sa pribadong Korean company,” matud ni Konsehal Jayson Repaso kinsa usa ka abogado.

Niadtong Septiyembre 28, ang konseho nipasar og lima ka resolusyon nga naghangyo kang Mayor Jose Esgana sa paghimo og aksyon, paghangyo sa DENR sa pag-isyu og Cease and Desist Order, pagpaimbestigar sa DENR ug pagpasaka sa tukmang kaso, paghangyo sa Environment Ombudsman sa pagpahigayon og fact finding investigation ug paghangyo sa Armed Forces of the Philippines sa pag-imbestigar kung nganong dunay mga sakop sa Citizen Armed Force Geographical Unit (CAFGU) atol sa pag-instalar sa mga solar panels.

“Gipasubay lang unta sa balaud, wala untay problema ang tanan. Sa kadaghan sa butangan sa solar panel ngano adto man jud ibutang sa lugar nga gidili sa balaud? Morespeto unta ni sila sa balaud ug sa katawhan sa Santa Fe,” dugang ni Repaso.

Niadtong Oktubre 2, ang mga opisyal ug mga residente sa Barangay Balidbid nga gipangulohan ni Kapitan Madelyn Rayco namutang og itom nga ribbon sa kadalanan sa barangay isip protesta sa giingong pagpanamastamas sa kalikupan nga wala gani pagtugot sa konseho sa barangay ug sa lungsod.