Bato nidonar og P100 MIL sa Naga
CEBU, Philippines — Si Bureau of Corrections Chief Ronald “Bato” de la Rosa miduaw kagahapon sa mga biktima sa landslide sa Dakbayan sa Naga ug mitunol og P100 mil nga hinabang sa siyudad.
Si de la Rosa miklaro hinuon nga ang iyang pagduaw walay kalambigitan sa iyang senatorial bid sa May 2019. Matud niya, bisan kinsa nga nakadungog sa nahitabo sa Naga, mobati gyud og kaluoy. Ang pagdahili sa yuta sa Barangay Tinaan nikalas og 78 ka tawo ug duna pay missing samtang siyete mil ka tawo ang naapektahan.
“Wa man ta mangam-panya. Nitabang ra man ta. May eleksyon o wala, kung duna tay ikatabang nganong di man ta motabang, di ba? Di man na tungod nga modagan or dili. Motabang gyud ta! Unta dili lang nila lainon pagsabot,” matud pang Bato sa mga tigbalita.
“Gamay nga hinabang para sa mga biktima. Gikan to sa mga amigo nato nga ganahan motabang nga di magpabanggit sa ilang ngalan,” matud pa niya.
Sa pagkakaron, ang mga bakwit naa pa gihapon nipasilong sa onse ka mga evacuation centers sud na sa duha ka semana.
Niadtong adlaw nga Sabado gipahunong na ang search and retrieval operations apan magpadayon gihapon ang paghawan sa mga debris diha sa ground zero. Tungod niini, ang siyudad nagkinahanglang bantayan ug modumala sa mga evacuation centers samtang giproseso pa ang ilang balhinan nga relocation site nga mao ang Balili Property. Sugdan na usab unta paghimo og post-disaster needs assessment (PDNA) sa Provincial Disaster Risk Reduction and Management Office (PDRRMO) ug ubang mga ahensya sa gobiyerno aron maoy ilang basehan sa paghimo og pundasyon sa rehabilitation and recovery plan. Ang PDNA dunganon uban sa geo-hazard assessment sa Mines and Geosciences Bureau (MGB) sa ground zero lakip na niini ang pagtino kon luwas pa bang pabalikon sa lugar ang mga residenteng namakwit.
Karong adlawa, sugdan na sa Kapitolyo pinaagi sa Provincial Board ang diskusyon bahin sa resolusyon aron hatagan og otoridad ang gobernador pagdonar sa usa ka bahin sa Balili property. (Gikan sa The Freeman/IBM)(BANATNEWS)
- Latest
