Gwen Garcia mag-gobernador gyud

CEBU, Philippines — Subling gideklarar ni kanhi gobernador ug karon Kongresista Gwendolyn Garcia sa ikatulong distrito sa Lalawigan sa Sugbo ang tinguhang pagpapili isip gobernador.

Kini dihang gihinabi sa mga tigbalita atol sa stakeholders’ forum nga gipahigayon sa Isla sa Bantayan kagahapon.

Una nang giluwatan sa kongresista sa bagang duot sa katawhan nga nitambong sa maong kalihukan kung pabor ba kini silang magpasubli siya pagka-gobernador nga gihangop sa bagang duot sa katawhan.

Matud ni Garcia nga modagan gyud siya sa umaabot nga eleksyon isip gobernador diin aduna na siyay ka tandem nga iyang ipahibawo sa umaabot nga adlaw.

Dugang pa sa kongresista nga daku siya og matabang sa Sugbo kung direkta siyang motabang isip gobernador kay makapaminaw man siya sa yangungo sa tanang tawo, grupo ug stakeholders sama sa problema sa Bantayan nga wala niya makita sa kasamtangan karon nga administrasyon sa Kapitolyo.

Tinguha karon sa kongresista nga mobalik ang buhat nga maoy pasultihon ug dili sulti maoy pabuhaton kay wala na kini niya nakita sa Probinsiya sa Sugbo nga ang katawhan makatagamtam og serbisyo ug buot usab niyang mobalik sa numero uno ang probinsiya ug dili anaa lang sa ika-45.

Ang maong tinguha sa kongresista gidasonan usab sa mga opisyal sa kalungsuran nga mahinangpon sa pagbalik niini isip gobernador.

Si Victoria Estosa, manindahay og buwad sa Bantayan, nitug-an nga mosuporta ug mopaluyo gyud siya kang Garcia tungod sa maayong pamaagi niini dihang kini pa ang nagdumala sa renda sa pangagamhanan sa probinsiya. (/GMR)(BANATNEWS)