Soca ni Gullas kalit gioktaba
CEBU, Philippines – Kalit nga gioktaba ang State of the City Address (SOCA) ni Mayor Eduardo Gullas kagahapon nga nakapakurat ug nakapaintriga sa kadaghanan.
Ang mga opisyal sa barangay gipahibawo kagahapon sa buntag pinaagi sa pagtawag.
Ang SOCA ni Gullas ipahigayon unta alas 3 sa hapon kagahapon sa Talisay City Sports Complex.
Apan giklaro ni Dr. Jomar Rubio, executive secretary sa mayor, nga walay angay nga kabalak-an ang Talisaynon tungod kay may giatiman lang ang mayor.
Gani nipasabot man si Gullas nga gusto sab siya nga inig hatag niya sa iyang SOCA anaa ang mga opisyal sa barangay.
Asoy pa ni Rubio nga kay mao man ang gusto sa mayor ilang nahuna-hunaan nga itunong sa Barangayan Night o sa Employees Night nga kalihukan samtang nagsingabot ang kapistahan sa ilang patron nga si Sta. Teresa de Avila.
Usa sa mga atanganan sa SOCA ni Gullas mao ang pagyagyag niya sa iya unyang mga kauban sa sunod tuig nga piniliay.
Dugang ni Rubio nga ila unang sabotan kun unsa gyud adlawa sa sunod semana ang maong kalihukan. (/GMR)(BANAT NEWS)
- Latest