15-anyos nga pusher nadakpan
CEBU, Philippines – Usa ka 15- anyos nga nagpayuhot og shabu ug laing duha ang nasikop sa kapulisan sa Dakbayan sa Talisay sa Sitio Mananga, Barangay Tabunok niadtong Martes sa hapon.
Ang mga dinakpan mao sila si Jumbert Kho, 30, nga taga Artville, Barangay San Isidro sa maong siyudad; Ronny Ydora, 39, nga taga Campo 4 sa maong dakbayan ug ang menor de edad.
Ang kapulisan nakadawat og report labot sa ilegal nga kalihukan sa lugar hinungdan nga gituyo gyud sa pagsulod sa kapulisan ang lugar aron sa paghimo og surveillance.
Apan sa pagsulod pa lang nila nisugat na nila ang menor ug niendorsar sa iyang baligya nga shabu nga aduna’y lain-laing porma. Samtang gitagaan sab sa menor og ilegal nga drugas ang laing duha ka adik apan wala kini namayad kay lagi utangan pa nila ang naulahi.
Wa maglangan ang mga operatiba ug ilang gisikop ang tanang mga durugista. (/IBM)(BANAT NEWS)
- Latest