Polis gidunggab patay

CEBU, Philippines — Namatay pag-abot sa tambalanan ang usa ka polis human gitabangan og dunggab sa manag-amahang silingan nga giingong nagumon sa ilegal nga drugas diha sa Sitio Kulo, Barangay Pajac,  Dakbayan sa Lapu-Lapu sa miaging gabii.

Si Senior Police Officer 2 Romulado Añana sa homicide section sa Lapu-Lapu City Police Office  (LLCPO) miila sa biktima nga mao si Police Officer 3 Alcestes Roxas, 40, nadestino sa Aviations Security Unit-7 sa Mactan Cebu International Airport ug nagpuyo usab sa  maong dapit.

Ang mga suspek mao sila si Domingo Lumongsod  Jr., 44, ug anak niini nga si Angelito Malinao, 22. Matud pa ni Añana kanunay nang gibadlong sa biktima ang maong suspetsado tungod  sa pagsige niini og suyop.

Apan gikatahong gikasuko kini ni Malinao nga misangpot sa ilang panaglalis hangtod nga misumbong kini ngadto sa amahang si Lumungsod ug ang duha nakigsinumbagay sa biktima ug pagkahuman gitabangan nila og dunggab.

Nadakpan hinuon ang mga suspetsado sa follow-up operation sa kapolisan.

Si  Chief Inspector Wayne Magbanua nga maoy hepe sa Precinct 2 sa Lapu-Lapu City Police Office (LCPO) miingon nga kasohan og murder  ang duha.

“This is a glaring example nga bisa’g user sitahon nimo delikado. Mao na ang police mag-amping gyud,” matud pa ni Chief Supt. Debold Sinas atol sa press conference kagahapon.

Tungod niini, miluwat og direktiba si Sinas nga kadtong masita diha sa kadalanan idiretso na lang sa police station ug didto kapkapan alang na sab sa seguridad sa polis naka-duty man o wala. (BANAT NEWS)