Tighimo og paltik nadakpan

CEBU, Philippines —  Gidakop sa kapolisan ang usa ka tawo sa dalan F. Rollota sa Barangay Poblacion, Dakbayan sa Danao nga giingong tighimo og mga paltik nga armas atol sa buy-bust operation alas 5 pasado ang takna sa miaging hapon.

Si Superintendent Jaime Quiocho Jr. sa Danao City Police Station miila sa nadakpan nga mao si Glenn Avila Capoy nagpuyo sa Sandayong Sur sa nahisgutang dakbayan.

Nakuha sa kapolisan ang mga kahimanan niini sa pagpanggama og armas ug mga nahuman na ug wala pa mangahuman nga klase-klaseng kalibre sa armas nga gibanabanang mokabat tanan og P3 milyones.

Ang mga operatiba sa Regional Intelligence Division- Regional Special Operation Group maoy nangulo sa operasyon.

Si Police Regional Office-7 Debold Sinas nagkanayon gipangusgan nila karon ang kampanya batok sa loose firearms ilabi na nga nagsingabot na ang 2019 elections.

Sumala pa ni Sinas nga adunay mga politiko nga naghupot og mga armadong grupo nga posibleng magamit aron pagpanghasi.

Matud pa niya nga nakadawat na sila og mga taho labot sa illegal nga kalihokan ni Capoy hinungdan nga kini gipanid-an ug dihang positibo gihimo dayon ang operasyon.

Sa laing bahin duha ka lalaking naghupot og armas ang gidakop diha sa Sitio Camaligbato, Barangay Taboc sa maong dakbayan niadtong Huwebes sa gabii.

Ang nasikop mao sila si Jonathan Cañedo, 29, ug Raymundo Almia, 41, taga Sitio Cogon, Barangay Guinsay. Ang duha gidakop human nagpasalba ang duha og armas. Nakuha gikan kanila ang usa ka kalibre 45 pistola ug .357 nga armas ug lakip na ang mga bala.  - Rowena D. Capistrano, IBM (BANATNEWS)