Talisay nihatag P1M sa Naga

CEBU, Philippines – Nihatag og P1 milyon ug mga goods ang kagamhanan sa Dakbayan sa Talisay ngadto sa kagamhanan sa Dakbayan sa Naga.

Matud ni Talisay City Mayor Eduardo Gullas nga pagkaon, tubig ug kwarta maoy nag-una nga panginahanglanon matag higayon nga adunay katalagman nga motumaw.

Samtang si Bise Mayor Alan Bucao niingon nga nasabutan nila sa konseho nga mohatag og ayuda nga kuhaon gikan sa Quick Response Fund.

Ang kagamhanan sa Dakbayan sa Naga nga pinangulohan ni Mayor Kristine Vanessa Chiong mapasalamaton sa tanang nipaambit sa ilang mga hinabang.

Si Department of Social Welfare and Development-7 Director Ma. Evelyn Macapobre nanawagan sa katawhan nga gusto motabang sa mga biktima sa landslide sa Dakbayan sa Naga nga segurohon nga magamit ug mapahimuslan ang ilang mga donasyon sama sa mga used clothing.

Matud ni Macapobre nga ang mga biktima sa katalagman hatagan sab og dignidad isip tawo ug batonan ang kalimpyo aron kalikayan ang sakit.

Gitataw sab ni Macapobre nga mas gikinahanglan karon sa mga pamilya nga naa sa evacuation centers ang mga hygiene kits, gatas, school supplies, habol, banig, unlan, diaper sa bata, adult underwear, eco-bags ug dagku nga plastic boxes.

Kadtong modonar og pagkaon o kaha magpakaon, mas maayo nga mopahibalo sa donations desk sa Dakbayan sa Naga alang sa schedule.

Kagahapon sa buntag niabot na ngadto sa P1,012,149.25 ang cash donations ug niabot na sa 1,716 ka pamilya ang o 7,653 ka tawo ang anaa sa evacuation centers. (/GMR)(BANAT NEWS)