Lima ka kongresista nisuporta kang Davide

CEBU, Philippines — Lima ka kongresista sa Lalawigan sa Sugbo ang nipadangat og suporta sa kandidatora ni Gobernador Hilario Davide, III.

Kini ang pangangkon ni Davide kinsa unang nipahibalo nga siya magpasubli og pili sa parehong position sa umaabot midterm election sa sunod tuig.

Ang maong mga kongresista gilangkuban nila ni Gerald Anthony “Samsam” Gullas sa unang distrito, Wilfredo Caminero sa ikaduhang distrito, Red Durano sa ikalimang distrito, Jonas Cortes sa ikaunom nga distrito ug Peter John Calderon sa ikapitong distrito.

Gawas sa mga kongresista, si Davide naglaom nga suportado gihapon siya sa mayoriya sa mga mayor sa kalungsuran.

Gibutyag ni Davide nga uban sa mga   mayor nipadayag kini og suporta kaniya lakip na ang mga nitapon sa Partido Demokratiko Pilipino-Lakas ng Bayan (PDP-Laban).

Ang gobernador nagkanayon nga ilang gihan-ay karon ang lineup sa ilang partido sa Liberal Party alang sa umaabot nga piniliay diin siya ang modagang gobernador ug sila gihapon ni Bise Gobernador Agnes Magpale ang magpares. (BANAT NEWS)