20 sa nakalas gilubong na

CEBU, Philippines — Danguyngoy ug hilak maoy nihabol sa Naalad Public Cemetery kagahapon sa hapon sa dihang dul-an sa 20 ka mga tawo nga natabunan sa landslide sa Sitio Sindulan ug Tagaytay 2, sa Barangay Tinaan sa Dakbayan sa Naga ang gilubong na sa mga kabanay.

Usa sa mga pamilyang naglubong sa ilang mga nakalas mao ang pamilyang Campanilla. Kinse ka sakop sa ilang banay ang natabunan sa yuta.

Usa ka misa requiem ang gipahigayon sulod sa St. Francis de Assisi Parish, nga gitambungan sa mga kaparyentihan sa mga namatay. Nagsuot sila og face mask tungod sa alisbo sa minatay.

Human sa misa gisunod gilayon ang paghatod kanila sa maong sam-ang diin 19 ang gilubong samtang ang usa didto gilubong sa Naga Old Public Cemetery.

Matud pa ni Hermogenes Aliganga, amahan ni Jenessa Campanilla nga lakip sa namatay uban sa bana niini ug lima ka anak, nakalitan siya sa kamatayon sa iyang anak ug sa pamilya niini.

Sumala pa niya way mga sakit nga gihambin ang iyang anak ug pamilya niini ug nagkakuyog pa sila niini niadtong Septiyembre 17.

Dugang pa ni Aliganga, nanaad pa si Jenessa nga ipaberha ug ipa-tiles niini ang lubnganan sa iyang maguwang nga si Michael Aliganga nga nitaliwan niadtong Nobiyembre sa nilabay nga tuig.

Sumala pa niya  gustohon man niini nga mangayo og hustisya sa kamatayon sa iyang anak, umagad ug mga apo apan wala silay ikasukol kon magkinihaay na. Ihangad na lang niya sa Kahitas-an ang tanan ug mao nay bahala mopakanaog sa hukom sa mga nakaingon sa maong trahedya.

Samtang si Sarah Ocampo, silingan sa mga Campanilla dakong pasalamat nga nakaikyas ug luwas ra silang tanan sa ilang banay kay milagrong wala matabuni og apil ang ilang balay.

Sumala pa niya, sadya ug malipayon ang ilang purok sa wala pa mahitabo ang landslide, apan karon gihulagway niya kining nagsusama og “ghost town” tungod sa kamingaw ug kasubo sa palibot ilabi na nga daghan pa sa ilang mga silingan ang wala pa gihapon igkita.

Samtang si Christopher Semilla, usa sa mga survivor sa landslide bisan og nagtakiang nibisita sa tanan niyang mga kanhi silingan ug kaila nga nakalas. Gitug-an niini nga hangtod karon padayon gihapon mohadla kaniya ang panghitabo atol sa iyang pagkatulog ug pag-inusara.

Base sa talaan sa Command center niabot na ngadto sa 51 ka tawong nakalas ang naugkat, 10 ang naangol, 45 ang wala pa makita ug 1,450 ka pamilya o 6, 256 ka tawo ang naa karon nihiklin sa siyam ka mga evacuation centers sa Naga ug sa silingang lungsod sa San Fernando. (BANAT NEWS)